आळेफाटा : बेल्हे (ता. जुन्नर) येथे दत्तनगर परिसरात शनिवारी (ता. १२) मध्यरात्रीच्या सुमारास अज्ञात चोरट्यांनी एका शेतकऱ्याच्या शेतातील लावणीस आलेले सुमारे ८ हजार रुपये किमतीचे अंदाजे सात-आठ गुंठे क्षेत्रावरील कांदा रोप चोरून नेले. दरम्यान यापूर्वी परिसरातून विद्युत मोटारी चोरीला जाण्याचे प्रकार घडत होते, मात्र आता चक्क कांदा रोपांचीही चोरी होऊ लागली आहे.

- पुण्याच्या बातम्या वाचण्यासाठी येथे ► क्लिक करा

याबाबत समजलेल्या माहितीनुसार, बेल्हे येथे दत्तनगर परिसरात देविदास बबन पिंगट यांनी चार हजार रुपये किलो दराने कांद्याचे बियाणे खरेदी करून,  घरापासून काही अंतरावर शेतात कांदा रोप टाकले आहे. सुमारे दोन एकर क्षेत्राला पुरेल एवढे कांद्याचे रोप आठ-दहा दिवसांनी पुनर्लागवाडीसाठी तयार होणार असल्याचे सांगण्यात आले.

सध्या कांदा रोप कोवळे असून पाणी दिल्याने वाफसा नव्हता. अज्ञात चोरट्यांनी शनिवारी (ता. १२) मध्यरात्रीच्या सुमारास यापैकी अंदाजे सात - गुंठे क्षेत्रावरील कांदा रोप उपटून चोरून नेले. दरम्यान हे कोवळे रोप असल्याने वाफश्याअभावी चोरट्यांना व्यवस्थित उपटता न आल्याने त्यातीलही निम्मेअर्धे रोप वाया जाणार असल्याचे संबंधित शेतकऱ्याचे म्हणणे आहे. लॉकडाउनच्या काळात गीर गाईच्या दुधाला दुप्पट मागणी वाढली

याबाबत संबंधित शेतकऱ्याने पोलिसांनाही कल्पना दिली आहे. दरम्यान सध्या कांद्याच्या रोपांचे दर वाढले असून, पैसे देऊनही खात्रीशीर कांदा रोप मिळत नाही अशी परिस्थिती आहे. यामुळे शेतकऱ्यांवर कांदा लागवडीसाठी तयार केलेल्या कांदा रोपांचे राखण करण्याची वेळ आली आहे. 

(संपादन : सागर डी. शेलार)