शिक्रापूर (पुणे) : शिरूर तालुक्‍यातील शिक्रापूर येथे दोन दिवसांपूर्वी कोरोनाबाधित गर्भवती महिला सापडल्यामुळे हैराण झालेल्या येथील नागरिकांना आज दिलासा मिळाला. तिच्याशी संबंधित चौघांचे वैद्यकीय अहवाल आज निगेटिव्ह आले, अशी माहिती वैद्यकीय अधीक्षक डॉ. वैजनाथ काशीद यांनी दिली. 

पुण्यात पोलिसाच्या नव्हे, तर माकडांच्या भीतीने रस्ते सामसूम

शिक्रापूर येथील मोठ्या गृहप्रकल्पात रहिवासी असलेली एका 31 वर्षीय महिलेला दोन दिवसांपूर्वी (ता. 2) कोरोना झाल्याचे निदर्शनास आले. परिसरातील कोरोनाबाधित होणारी ती चौथी रुग्ण होती. त्यामुळे शिक्रापूर परिसर भीतीच्या सावटाखाली होती. त्यातच एक रुग्ण कोरोनामुळे मृत्यू पावल्याने गावात गंभीर वातावरण आहे. या पार्श्‍वभूमीवर कोरोनाबाधित महिलेशी संबंधित तिची आई, पती, नर्स व रुग्णवाहिका चालक यांनाही क्वारंटाइन करून त्यांचे नमुने तातडीने मुंबईत पाठविले होते. त्याचा अहवाल आज निगेटिव्ह आला. 

पुण्याच्या इतर बातम्या वाचण्यासाठी येथे क्लिक करा 

दरम्यान, चौघांचे अहवाल कसेही आले; तरी आम्ही ही बाब गांभीर्याने घेतलेली असून, गावात सर्व पद्धतीच्या दक्षता घेत आहे. संबंधित महिला राहत असलेल्या रहिवासी सोसायटीत ग्रामपंचायतीकडून निर्जंतुकीकरणाचे काम सुरू असल्याची माहिती प्रभारी सरपंच भगवानराव वाबळे यांनी दिली. 

दारूसाठी मात्र रांगा 
सर्व दूर कोरोनाचे सावट आणि गावात पंधरा दिवसांपूर्वी कोरोनामुळे एकाचा मृत्यू झाला असतानाही आज दारू विक्रीला सरकारने दिलेल्या परवानगीने येथील वाइन शॉपवर तब्बल 500 ते 600 मीटरपर्यंत मद्यपींच्या रांगा लागल्या होत्या.