शिरूर (पुणे) : नगर जिल्ह्यातील केडगाव येथून लॅपटॉप, मोबाईल व इतर किमती साहित्य चोरून पळून जाणाऱ्या तरूणाला शिरूर तालुक्यातील टाकळी हाजी येथील कुंडाजवळ नाकेबंदीवर असलेल्या पोलिस व होमगार्डनी पाठलाग करून पकडले.
निखिल सुनील अटक (रा. वडझिरे, ता. पारनेर, जि. नगर) असे या चोरट्याचे नाव असून, त्याला आज नगरच्या कोतवाली पोलिसांच्या ताब्यात देण्यात आले. त्याच्याकडील दोन बॅगांतून दोन लॅपटॉप, सहा मोबाईल, दोन एटीएम कार्ड, चार पॅनकार्ड व तीन हजार रूपये रोख, असा दोन लाखाचा मुद्देमाल पोलिसांनी जप्त केला. अटक याच्याविरूद्ध शिरूर पोलिस ठाण्यात गुन्हा दाखल करून आज कोतवाली पोलिसांकडे वर्ग करण्यात आला.
शिरूर पोलिस ठाण्यातील संतोष भारमळ, विशाल पालवे हे पोलिस; तसेच योगेश पांढरकर हा होमगार्ड टाकळी हाजी येथील कुंडरस्त्यावरील चेकनाक्यावर बंदोबस्त करीत असताना निघोजे (ता. पारनेर, जि. नगर) बाजूने संशयित निखिल अटक हा पायी येत होता. चेकपोस्टवर पोलिसांनी त्याला हटकले. त्यावेळी त्याने उडवाउडवीची उत्तरे दिली. त्यामुळे बॅगा व इतर साहित्य तपासावे लागेल, असे पोलिसांनी सांगताच त्याने जवळच्याच शेतात धूम ठोकली.
दरम्यान, पोलिसांनी प्रसंगावधान राखून पाठलाग करून त्याला पकडले. त्याच्याकडील बॅगांमध्ये महागडे मोबाईल, लॅपटॉप व एटीएम आढळून आल्याने पोलिसांनी त्याची कसून चौकशी केली. तेव्हा कोतवाली पोलिस ठाण्याच्या हद्दीतील केडगाव येथील दुकानातून हे साहित्य चोरल्याची कबुली त्याने दिली.
शिरूर पोलिसांनी निखिल अटक याच्याविरूद्ध गुन्हा दाखल करून कोतवाली पोलिसांकडे चौकशी केली. त्यावेळी प्रकारचे साहित्य चोरीला गेल्याचे व त्याबाबत तक्रार दाखल असल्याचे कळविले. त्यामुळे अटक याला आज कोतवाली पोलिसांच्या ताब्यात दिले असल्याचे पोलिस निरीक्षक प्रवीण खानापुरे यांनी सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.