पुण्याचे नवनिर्वाचित खासदार मुरलीधऱ मोहोळ यांनी बारामतीच्या खासदार सुप्रिया सुळे यांच्यावर सडकून टीका केली आहे. आपल्यासारख्या सोन्याचा चमचा घेऊन जन्मलेल्यांच्या हे पचणी पडणारं नाही, अशा शब्दांत मोहोळ यांनी सुळे यांना टार्गेट केलं आहे. मोहोळ यांना मंत्रीपद मिळाल्यानंतर त्याचा फायदा ठेकेदारांना व्हायला नको, अशी घणाघाती टीका सुप्रिया सुळे यांनी केली होती. त्याला प्रत्युत्तर देताना मोहोळ यांनी ट्विट केलं आहे. (those born with a golden spoon Pune MP Muralidhar Mohol criticizes Supriya Sule)

मोहोळ यांनी ट्विट करत सुप्रिया सुळे यांच्यावर निशाणा साधला आहे. त्यांनी म्हटलं की, मा. सुप्रियाताई, शुभेच्छांबद्दल आपले मनःपूर्वक धन्यवाद!

खरं तर जवळपास ४० वर्षांनंतर जनतेतून निवडून आलेल्या पुण्याच्या खासदाराला मंत्रीपदाची संधी मिळाली, ही बाब समस्त पुणेकरांना गौरवान्वित करणारी आहे आणि पुण्याची राजकीय संस्कृती पाहिली तर यांचं निखळ मनानेच स्वागत अपेक्षित होतं. असो, पण या निमित्तानं आपल्या कोत्या मनोवृत्तीचं दर्शनही पुणेकरांना घडलं.

ताई, आपली ‘मळमळ’ आम्ही समजू शकतो. माझ्यासारख्या सामान्य घरातील कार्यकर्त्याला थेट केंद्रीय मंत्रीपदावर संधी मिळणे, हे आपल्यासारख्या सोन्याचा चमचा घेऊन जन्मलेल्यांना लवकर पचणी पडणारे नाही. त्यामुळं आपली टिपण्णी स्वाभाविक मानतो.

उरला प्रश्न ठेकदारांचा,

तर ठेकेदार कोणी पोसले? कोणी मोठे केले? पुण्यातील आणि महाराष्ट्राचे मोठे ठेकेदार कोणाचे पार्टनर आहेत? हे अवघ्या महाराष्ट्राला माहिती आहे. त्यामुळे असल्या तकलादू टिपण्णी करुन स्वतःचं हसं सोडून दुसरं काही होणार नाही.

सुप्रिया सुळे काय म्हणाल्या होत्या?

पहिल्यांदाच खासदार बनलेल्या मुरलीधर मोहोळ यांना पहिल्याच टर्ममध्ये मंत्रीपदाची लॉटरी लागल्यानं सुप्रिया सुळे यांनी त्यांच्यावर खोचक टीका केली होती. पुण्याला मिळालेल्या मंत्रीपदाचा फायदा पुणेकरांना व्हायला हवा ठेकेदारांना नको, असं सुळे यांनी म्हटलं होतं. पुण्यातील रोजगाराचं हब असलेल्या हिंजवडी आयटीपार्कमधून ३५ ते ४० कंपन्या बाहेर पडल्यावरुन सुळे यांनी मोहोळ यांचं नाव न घेता भाजपला टार्गेट केलं होतं.