पुणे - खंडणीचा गुन्हा दाखल न करण्यासाठी तक्रारदाराकडून दीड लाख रुपयांची लाच घेताना पिंपरी-चिंचवड पोलिस आयुक्तालयांतर्गत निगडी पोलिस चौकीतील एका सहायक पोलिस निरीक्षकासह पोलिस कर्मचारी आणि मध्यस्थाला लाचलुचपत प्रतिबंधक विभागाने शनिवारी रात्री अटक केली.

याबाबत एका ४८ वर्षीय महिलेने तक्रार दिली होती. सहायक पोलिस निरीक्षक अमोल प्रकाश कोरडे, पोलिस कर्मचारी सागर तुकाराम शेळके आणि मध्यस्थ सुदेश शिवाजी नवले (वय 43, रा.वाल्हेकरवाडी, चिंचवड अशी गुन्हा दाखल झालेल्यांची नावे आहेत. निगडी प्राधिकरण येथील सेक्टर क्रमांक २७ मधील तक्रारदाराच्या घरी लाचलुचपत प्रतिबंधक विभागाच्या पथकाने सापळा रचून ही कारवाई केली.

लाचलुचपत प्रतिबंधक विभागाचे पोलिस अधीक्षक अमोल तांबे यांनी दिलेल्या माहितीनुसार, एका महिला तक्रारदार यांनी त्यांच्या ओळखीच्या व्यक्तीला उधार आणि बँकेमधून कर्ज काढून पैसे दिले होते. बँक कर्जाचे हप्ते न भरल्यामुळे तक्रारदार यांनी त्यांच्याकडे उधार दिलेल्या पैशांची मागणी केली. त्यावर त्यांनी महिला तक्रारदाराच्या विरोधात निगडी पोलिस ठाण्यात अर्ज दिला होता.

हा अर्ज चौकशीसाठी सहायक पोलिस निरीक्षक अमोल कोरडे यांच्याकडे आला. त्यावेळी तक्रारदाराविरुद्ध खंडणीचा गुन्हा दाखल न करण्यासाठी अमोल कोरडे, पोलिस कर्मचारी सागर शेळके आणि खासगी मध्यस्थ नवले यांनी तक्रारदाराकडे दीड लाख रुपये लाचेची मागणी केली. याबाबत महिला तक्रारदार यांनी लाचलुचपत प्रतिबंधक विभागाच्या पुणे कार्यालयात तक्रार दिली होती.

या तक्रारीची पडताळणी केली असता, कोरडे आणि शेळके यांच्यावतीने नवले याने लाचेची मागणी केल्याचे निष्पन्न झाले. ही रक्कम नवले याने स्वीकारल्यानंतर या तिघांना ताब्यात घेण्यात आले असून, निगडी पोलिस ठाण्यात भ्रष्टाचार प्रतिबंधक अधिनियमाखाली गुन्हा दाखल करण्यात आला आहे.

पोलिस अधीक्षक अमोल तांबे, अतिरिक्त पोलिस अधीक्षक शीतल जानवे यांच्या मार्गदर्शनाखाली पोलिस उपअधीक्षक माधुरी भोसले, पोलिस निरीक्षक प्रवीण निंबाळकर, पोलिस हवालदार नवनाथ वाळके, पोलिस कर्मचारी सौरभ महाशब्दे, शिल्पा तुपे, पांडुरंग माळी यांनी ही कारवाई केली.