कुरकुंभ (पुणे) : रावणगाव (ता. दौंड) येथील एका शेतकऱ्याच्या ट्रॅक्टरची चोरी केल्याप्रकरणी तीन आरोपींना पुणे ग्रामीण पोलिसांच्या स्थानिक गुन्हे अन्वेषण शाखेच्या पथकाने सोमवारी (ता. २१) अटक केली.

 - ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

रावणगाव येथील शिरसाई दूध डेअरीजवळून ८ ऑगस्ट २०२० रोजी रात्री महिंद्रा कंपनीचा ६ लाख ८० हजार रुपये किमतीचा ट्रॅक्टर चोरीला गेला होता. यासंदर्भात दौंड पोलिसात गुन्हा दाखल केला होता. पुणे ग्रामीण पोलिसांच्या स्थानिक गुन्हे अन्वेषण शाखेच्या पथकाला ट्रॅक्टर चोरीतील तीनही आरोपी रावणगाव येथे सोमवारी (ता. २१) येणार असल्याची माहिती मिळाली होती. त्यानुसार पथकाने रावणगाव येथून गणेश नंदकुमार भागवत (वय २७, रा. पाटस), बाबासाहेब ऊर्फ भाऊ गाढवे (वय २७) व मंगेश गाढवे (वय २६, दोघे रा. रावणगाव) या तीन आरोपींना अटक केली. आरोपींकडे अधिक चौकशी केल्यास त्यांनी ट्रॅक्टर चोरी केल्याची कबुली दिली.

ऑनलाइन शाळेसाठी पालक आग्रही; मात्र शाळांचा नकार

हा चोरीचा ट्रॅक्टर प्रवीण ऊर्फ भय्या बबन हरणावळ (रा. श्रीराम सोसायटी, इंदापूर) याला विकल्याची माहिती त्यांनी दिली. त्याआधारे गुन्हे अन्वेषण शाखेच्या पथकाने ट्रॅक्टर ताब्यात घेतला. या पथकाने तीनही आरोपी व ट्रॅक्टर दौंड पोलिसांच्या ताब्यात दिला. 
या पथकामध्ये स्थानिक गुन्हे शाखेचे पोलिस निरीक्षक पद्माकर घनवट, पोलिस उपनिरीक्षक शिवाजी ननावरे, पोलिस हवालदार महेश गायकवाड, नीलेश कदम, सचिन गायकवाड, पोलिस नाईक सुभाष राऊत, गुरू गायकवाड, अक्षय जावळे यांचा समावेश होता.