मांडवगण फराटा, ता. २६ : इनामगाव (ता. शिरूर)येथून श्री संत मुकिंदराज महाराज व गोपाळनाथ स्वामी महाराज पायीवारी पालखीचे मंगळवारी (ता. २४) वाजतगाजत टाळ- मृदंगाच्या गजरात पंढरपूरकडे प्रस्थान झाले.
पालखीचे यंदा १५वे वर्ष आहे. यावेळी पालखीचा रथ आकर्षक फुलांनी सजवण्यात आला होता. हातात भगवी पताका घेऊन ‘ज्ञानोबा तुकाराम’ ‘जय हरी विठ्ठल’च्या जयघोषात पालखीचे प्रस्थान करण्यात आले. यावेळी भीमा घोड फार्मर प्रोड्यूसर कंपनीचे अध्यक्ष संतोष नागवडे, कृष्णाजी थोरात, नवनाथ नागवडे, ज्ञानेश्वर नागवडे, महेश नागवडे, शरद नागवडे आदी पाहुण्यांच्या हस्ते पादुकांची पूजा करण्यात आली. ग्रामस्थांनी रस्त्याच्या कडेने आपापल्या घरासमोर आकर्षक रांगोळ्या काढल्या होत्या. ठिकठिकाणी ग्रामस्थांनी मनोभावे पालखीचे दर्शन घेतले. दत्तात्रेय महाराज लाटे यांनी सर्वांचे स्वागत केले. यावेळी आमदार माउली कटके यांच्यातर्फे २५० वारकऱ्यांना रेनकोटचे वाटप केले. यावेळी मनीषा माउली कटके, शिवाजी महाराज मचाले, बापूराव महाराज वाळुंज, दिलीप मचाले, बापूराव मोकाशी, रामभाऊ मोकाशी, शहाजी घाडगे, अनिल महामुनी, दिलीप निंबाळकर, सरपंच अनुराधा घाडगे, विजयसिंह मोकाशी, पल्लवी घाटगे, तात्यासाहेब घाडगे, तात्यासाहेब मचाले, श्रीनिवास घाडगे, सोसायटीचे अध्यक्ष शहाजी शिंदे, रवींद्र घाडगे, तुकाराम मचाले व पंचक्रोशीतील वारकरी आणि ग्रामस्थ उपस्थित होते.
या पालखी सोहळ्यात इनामगाव पंचक्रोशीतील वारकरी सहभागी झाले आहेत. पालखी दौंड, बोरिबेल (ता. दौंड), राजेगाव, डाळज नं २, जंक्शन स्टेशन, तरंगेवस्ती, रेडणी, फडतरे वस्ती, वेळापूर, पिराची कुरवली, वाखरी मार्गे पंढरपूर येथे जाणार आहे. पालखीमध्ये एकूण १४ प्रवचनकार आणि कीर्तनकार आपली सेवा देणार आहेत.