आंधळगाव, ता. ४ : कोळगाव डोळस (ता. शिरूर) येथील बिरदेव महाराज पायी दिंडी पालखी सोहळ्याचे शनिवारी (ता. २) दुपारी श्री क्षेत्र साकूर कडे प्रस्थान झाले. या सोहळ्याची सुरुवात गजनृत्याच्या बहारदार सादरीकरणाने झाली. ज्याने उपस्थितांचे लक्ष वेधून घेतले. पालखी सोहळा प्रस्थानानिमित्त कोळगाव येथे विविध सांस्कृतिक आणि धार्मिक कार्यक्रम घेण्यात आले. पहाटे बिरदेव महाराजांचा अभिषेक झाला, सकाळी विधिवत पूजा आणि महाआरती झाली. सकाळी ९ वाजता आनंदगड संस्थानचे विश्‍वस्त गुरुदास महाराज जगताप यांचे कीर्तन झाले. यानंतर मान्यवरांच्या हस्ते श्रींची पद्यपूजा करण्यात आली. यासह रथ पूजा, पालखी पूजा करण्यात आली. ‘हरहर महादेव’, ‘बिरदेव महाराज की जय’च्या घोषात भंडाऱ्याची उधळण करत पालखी सोहळ्याचे प्रस्थान झाले. यावेळी येथील विरभद्र बिरोबा मंडळ, भैरवनाथ प्रतिष्ठान, बिरोबा मित्र मंडळाच्या वतीने गज नृत्य सादर करण्यात आले. या गज नृत्याने सर्वांचे लक्ष वेधले. हा पालखी सोहळा निर्वी, गुणाट, निमोणे, गोलेगाव, शिरूर, पारनेर, वासुंदे, मांडवे मार्गे साकूर येथे पोहोचणार आहे.
या प्रसंगी जिल्हा परिषदेचे माजी सदस्य मंगलदास बांदल, आनंद गड संस्थानचे अध्यक्ष राजाराम महाराज जगताप, कोळगावचे माजी सरपंच सोमनाथ सूर्यवंशी, नारायण शेडगे, धोंडिबा जगताप, उपसरपंच सिद्धार्थ डोळस, सहकारी संस्थेचे उपाध्यक्ष बाबू गोरे, तंटामुक्ती समितीचे अध्यक्ष खंडू कोळपे, आबा नागवडे, कृष्णा गुलदगड, लक्ष्मण मोरे, नीलेश नागवडे, बाबू आंन्दु गोरे, जनार्दन कोळपे उपस्थित होते.