आळंदी, ता. २१ : स्थानिक स्वराज्य संस्थांच्या निवडणुकांचे वेध लागल्याने आळंदी आणि परिसरात आता नवरात्र उत्सवाच्या निमित्ताने दांडियाच्या टिपऱ्यांचा आवाज वाढणार आहे. आळंदी शहरात सात ठिकाणी तर आळंदी पंचक्रोशीतील गावांमध्ये ३६ ठिकाणी दांडियाचा कार्यक्रम आयोजित केला आहे. दांडिया खेळणाऱ्यांसाठी ही एक पर्वणीच म्हणावी लागेल.
नवरात्र उत्सव आणि दांडिया हे एक समीकरणच आहे. तरुणाईला याचे आकर्षण आहे. दांडियाच्या कार्यक्रमाला नेहमीच गर्दी असते. त्यामुळे राजकीय मंडळींनी आपली पोळी भाजण्यासाठी स्वतंत्रपणे दांडियाचा कार्यक्रम भरवीत आहेत. यासाठी आळंदी पोलिस ठाण्यामध्ये आळंदी शहरातून सात पंचक्रोशीतून ३६ ठिकाणच्या दांडिया कार्यक्रमासाठी परवानगी अर्ज आले आहेत. स्थानिक स्वराज्य संस्थांमधील जिल्हा परिषद पंचायत समिती तसेच नगरपरिषदेच्या निवडणुका तोंडावर आल्याने अनेकांना दांडियाच्या निमित्ताने आयते व्यासपीठ मिळणार आहे. याचाच फायदा घेत अनेक ठिकाणी खर्च करून दांडियाचे कार्यक्रमाचे आयोजन केले आहे. विविध ठिकाणी दांडिया खेळण्यासाठी सुविधा उपलब्ध करून देत बक्षिसे ठेवण्यात आली आहेत. दांडियाच्या खेळासाठी परवानगी देताना पोलिसांकडून अनेक अटी घालण्यात आल्या आहेत. मागील वर्षी एक दोन ठिकाणी भांडणे झाल्याने दांडियाचा कार्यक्रम बंद करावा लागला होता. सार्वजनिक शांतता भंग होऊ नये यासाठी शक्यतो बंदिस्त जागेत दांडिया कार्यक्रम घेण्यात यावा. आवाजाची पातळी कमी ठेवायला सांगितली असून ध्वनिवर्धकाचा वापर करण्यास बंदी आहे. रात्री दहा वाजण्याच्या आत सर्व कार्यक्रम बंद करण्याचे आवाहन पोलिसांकडून करण्यात आले आहे.