आळंदी, ता. २१: आळंदी-पुणे रस्त्यावर अवैध लॉजिंगच्या व्यवसाय आणि देहविक्री करणाऱ्या महिला रस्त्यावर उभे राहून इशारे करत आहेत. पुणे-आळंदी रस्त्यावरील वडमुखवाडी येथील एका शाळेसमोरच देहविक्री करणाऱ्या महिलांचा घोळका रस्त्याच्या बाजूला उभा असतो. यामुळे परिसरातील नागरिक तसेच विद्यार्थ्यांवर विपरीत परिणाम होत असल्याचे चित्र आहे.
लग्नाची ओळख असलेले आळंदी आता लॉजची आळंदी गणली जाऊ लागली आहे. आळंदीपासून ते वडमुखवाडी परिसरात अनेक जणांनी व्यवसायाच्या उद्देशाने लॉजिंग सुरू केले आहेत. मात्र याचा परिणाम सकारात्मक होण्याऐवजी वाईट होऊ लागला आहे. आळंदी शहरात इंद्रायणी नगर परिसर विश्रामगृह साई मंदिर परिसर या भागामध्ये अनेक ठिकाणी देहविक्री करणाऱ्या करणाऱ्या महिला उभ्या असतात. रस्त्यावरून येणाऱ्या जाणाऱ्या वाहनांना अश्लील स्वरूपात हात करतात. तसेच पुणे-आळंदी रस्त्यावरील वडमुखवाडी येथील उड्डाणपूला खाली रात्रीच्या वेळेस ही संख्या अधिक वाढत जाते. आळंदीमध्ये देहू फाटा ते गरुड स्तंभ या भागातही हीच परिस्थिती आहे. अनेक सामाजिक कार्यकर्ते राजकीय मंडळी यांनी याबाबत अनेकदा आवाज उठवला मात्र फारशी दखल घेतली गेली नाही.