आळंदी, ता. २६ : ‘‘नागरिकांमध्ये वाचनाची आवड निर्माण करणे, वाचन संस्कृती जपणे व सर्व वयोगटातील नागरिकांना दर्जेदार वाचन साहित्य उपलब्ध करून देणे ही काळाची गरज लक्षात घेऊन नगर परिषदेने महत्त्वपूर्ण निर्णय घेतला आहे. आळंदीत भारतरत्न डॉ. बाबासाहेब आंबेडकर सार्वजनिक वाचनालय आळंदी नगरपरिषद या नावाने वाचनालय सुरू केले जाणार आहे,’’ याबाबतची माहिती मुख्याधिकारी माधव खांडेकर यांनी दिली.
खांडेकर यांनी सांगितले की, हे वाचनालय नगर परिषदेच्या जुन्या इमारतीमध्ये नगरपरिषद चौकामध्ये उभारले जाणार आहे. प्रशासनाने याबाबत ठरावदेखील केला आहे. तसेच, जिल्हा नियोजन समितीकडे प्रस्ताव मंजुरीकरिता पाठवण्यात आला आहे. वाचनालय उभारणीसाठी लागणारा निधी लोकवर्गणी, नगरपरिषद निधी तसेच शासनाच्या विविध योजना यांच्या माध्यमातून उपलब्ध करून देण्यात येईल.