आळंदी, ता. ५ : मराठवाड्यात अतिवृष्टीमुळे आणि पुराच्या पाण्यात शेती आणि माती, जनावरे वाहून गेली. जगाचा पोशिंदा असणारा बळिराजा पुरता कोलमडून पडला. या बळीराजाला हात आणि साथ देण्यासाठी आळंदी (ता. खेड) येथील ज्ञानेश्वर विद्यालयाच्या विद्यार्थी सहाय्यक समितीच्या माध्यमातून ७५ हजार रुपयांचा जीवनावश्यक शिधा गोळा करून मराठवाड्यामध्ये पाठवण्यात आला.
गेली १४ वर्ष सातत्याने सेवेचा, दातृत्वाचा संस्कार मुलांमध्ये रुजविण्यासाठी ज्ञानेश्वर विद्यालयाचे विश्वस्त पदाधिकारी, सर्व शिक्षक- शिक्षकेतर कर्मचारी, विद्यार्थी व पालक यांनी एकत्रित येऊन विद्यार्थी सहाय्यक समितीच्या माध्यमातून एक दिवसात पूरग्रस्तांसाठी ७५ हजार रुपयांचा निधी उभारला.
या निधीतून गहू, तांदूळ, साखर, तेल आदी जीवनावश्यक वस्तू खरेदी करून त्या मराठवाड्यातील बांधवांसाठी रवाना केल्या. या समितीच्या माध्यमातून आतापर्यंत केरळ, कोल्हापूर येथील पूरग्रस्तांना मदत, तसेच देहू, कोयाळी, लोणावळा, ठाकूर पिंपरी, जुन्नर येथील अनाथाश्रम व वृद्धाश्रमांना मदत, कोरोनामध्ये आई- वडिलांविना पोरक्या झालेल्या विद्यार्थ्यांना आर्थिक मदत केली जाते.
याप्रसंगी संस्थेचे सचिव अजित वडगावकर, खजिनदार दीपक पाटील, विद्यालयाचे प्राचार्य सूर्यकांत मुंगसे, उपप्राचार्य किसन राठोड, पर्यवेक्षक प्रशांत सोनवणे, अनिता पडळकर, अनुजायीनी राजहंस, प्राथमिक विभागाचे मुख्याध्यापक प्रदीप काळे, समिती प्रमुख विठ्ठलदास गुट्टे, प्रज्ञा यादव, सर्व शिक्षक- शिक्षकेतर कर्मचारी, पालक, विद्यार्थी उपस्थित होते.