आळंदी,ता. ३ : आळंदी नगर परिषदेच्या प्रस्तावित २०२५-२६ मध्ये होणाऱ्या सार्वत्रिक निवडणुकीसाठीच्या दहा प्रभागाच्या अंतिम प्रभाग रचनेस पुणे विभागीय आयुक्तांच्या आदेशानुसार मान्यता मिळाली आहे. त्यामुळे आळंदीत राजकीय चर्चेला उधाण आले असून अनेक इच्छुकांचे लक्ष प्रभागातील आरक्षण सोडतीकडे लागले आहे.
आळंदी नगर परिषदेमध्ये फेब्रुवारी २०२२ प्रशासकीय कामकाज लागू झाले. त्यानंतर आजपर्यंत प्रशासकीय राजवट सुरू होती. नगर परिषदेमध्ये सध्या प्रभागनिहाय आरक्षण सोडत झाली नाही. मात्र, अंतिम प्रभाग रचनेनुसार आळंदी नगर परिषदेमध्ये आता एकूण दहा प्रभाग आहेत. यापैकी नऊ प्रभागामध्ये प्रत्येकी दोन सदस्य तर एका प्रभागामध्ये तीन सदस्य निवडून दिले जाणार आहेत. पूर्वी पेक्षा आत्ताच्या प्रभाग रचनेत दोन सदस्यांची वाढ झाली आहे. याबाबत माहिती देताना मुख्याधिकारी माधव खांडेकर यांनी सांगितले की, अंतिम प्रभाग रचना,अंतिम प्रभाग रचनेचा नकाशा आणि प्रभागांच्या चर्तुःसीमा नागरिकांच्या माहितीसाठी नगर परिषद कार्यालयात तसेच परिषदेच्या संकेतस्थळावर प्रसिद्ध केली आहे.

२१ पैकी ११ जागा महिलांसाठी राखीव
आगामी निवडणुकीमध्ये आळंदी नगर परिषदेमध्ये २१ नगरसेवक म्हणून निवडून जातील. या २१ जागा पैकी ११ नगरसेवकपद महिला राखीव आहेत. त्यापैकी ३ ओबीसी महिला, १ एससी महिला राखीव आहेत.