आळेफाटा, ता. २ : आळेफाटा येथील उपबाजारात शुक्रवारी (ता. १) दहा हजार ३७३ कांदा पिशवींची विक्रमी आवक होऊन एक नंबर कांद्यास दहा किलोला १७५ रुपये बाजारभाव मिळाला असल्याची माहिती सभापती संजय काळे उपसभापती प्रीतम काळे, सचीव रूपेश कवडे, व्यवस्थापक दीपक म्हस्करे यांनी दिली.
जुन्नर कृषी उत्पन्न बाजार समितीच्या मोढयांत एक नंबर सुपर गोळा कांद्यास दहा किलोस १६० ते १७५ रुपये बाजार भाव मिळाला होता. तसेच एक नंबर कांद्यास १४० ते १६० बाजारभाव मिळाला‌‌. दोन नंबर कांद्यास १२० ते १४० रुपये बाजारभाव मिळाला. तर तीन नंबर कांद्यास दहा किलोस १०० ते १२० रुपये बाजारभाव मिळाला तर बदला, चिंगळी कांद्यास दहा किलोस ३० ते ८० रुपये बाजार भाव मिळाला.
दरम्यान, काही दिवसांपासून वातावरणात सतत होत असलेल्या बदलामुळे ज्या शेतकऱ्यांनी कांदा साठवणूक करून ठेवला होता तो सडू लागला आहे. तो कांदा शेतकऱ्यांनी विक्रीस आणलेला दिसून येत आहे. सध्या मिळणारा बाजारभाव अतिशय कमी असून या बाजारभावातुन शेतकऱ्यांचा झालेला खर्च फिटत नसल्याने शेतकरी अडचणीत आलेला दिसून येत आहे.