आळेफाटा, ता. १३ ः आळे (ता. जुन्नर) येथील बी. जे. महाविद्यालयातील बीसीए- बीसीएस विभागात अंतिम वर्षात शिक्षण घेत असलेल्या विद्यार्थ्यांसाठी अल्फाबेट एक्स लर्निंग हब नारायणगाव यांच्या संयुक्त विद्यमाने संगणक व माहिती तंत्रज्ञान क्षेत्रातील नोकरीच्या संधी व करावयाची तयारी याबद्दल व्याख्यान आयोजित केले होते.
याप्रसंगी मयूरी बोडके, दत्तात्रेय श्रीराम, प्राचार्य डॉ. प्रवीण जाधव आदी उपस्थित होते. यावेळी दत्तात्रेय श्रीराम यांनी विद्यार्थ्यांनी नवीन तंत्रज्ञान व नवनवीन संधी याबद्दल सतत जागरूक राहून स्वतःला परिपूर्ण करत राहणे गरजेचे असल्याचे सांगितले. मयूरी बोडके यांनी विद्यार्थ्यांनी पदवी शिक्षण घेत असताना माहिती तंत्रज्ञान क्षेत्रातील नोकरीच्या संधी व त्यासाठी करावयाच्या तयारीबद्दल मार्गदर्शन केले.
महाविद्यालयाचे प्राचार्य डॉ. जाधव यांनी कृत्रिम बुद्धिमत्तेच्या युगात विद्यार्थ्यांनी स्वतःची बुद्धिमत्ता वापरणे न थांबवता आपला विकास करत यश संपादन करत राहिले पाहिजे म्हणजे नोकरीच्या संधी उपलब्ध होत राहतील, असे मत व्यक्त केले.
कार्यक्रमाचे आयोजन विभाग प्रमुख नूतन जोशी, रितेश खंडागळे, सायली खंडागळे, तेजल गायकवाड, साक्षी शिंदे, दीपांजली कदम आदी प्राध्यापकांनी केले.