आळेफाटा, ता. १८ ः राजुरी येथे पुणे जिल्हा परिषदेचे मुख्य कार्यकारी अधिकारी गजानन पाटील यांच्या संकल्पनेतून ‘सायकलचा आधार-भविष्याला आकार’ (सायकल बॅंक) हा उपक्रम सुरू करण्यात आला. जुन्नर तालुक्याचे गटविकास अधिकारी प्रतिक चन्नावार यांच्या मार्गदर्शनाखाली तो राबवण्यात आला. या उपक्रमांतर्गत गावातील ३५ विद्यार्थिनींना सायकलींचे वितरण करण्यात आले. यावेळी माजी सभापती दिपक आवटे, सरपंच प्रिया हाडवळे, उपसरपंच माऊली शेळके, वल्लभ शेळके, ग्रामपंचायत सदस्य एम. डी. घंगाळे, दिपक कणसे, पंकज कणसे, सोपान कदम, सत्यवान बोऱ्हाडे, गोरक्ष हाडवळे आदी उपस्थित होते.
गावातील शालेय गरजू विद्यार्थ्यांना शाळेत जाण्यास सुलभता व्हावी, त्यांचा प्रवास वेळ वाचावा तसेच शिक्षणात सातत्य राहावे या उद्देशाने हा उपक्रम हाती घेण्यात आला. गावातील विविध पतसंस्था, सोसायटी, दुधसंस्था, सेवाभावी संस्था व दानशूर व्यक्तींनी या उपक्रमात सक्रिय सहभाग घेत योगदान दिले. स्थानिक ग्रामस्थांनी या उपक्रमाचे स्वागत केले आहे. कार्यक्रमाचे सूत्रसंचालन जी. के. औटी यांनी केले. सरपंच प्रिया हाडवळे यांनी आभार व्यक्त केले.