आळेफाटा, ता. २० ः श्री क्षेत्र आळे (ता. जुन्नर) येथील श्री रेडा समाधी मंदिरातील श्री गणेश व श्री रिद्धी सिद्धी मूर्ती शिलेचे पूजन, तसेच धर्मध्वज भूमिपूजन सोहळ्याचे शुक्रवारी (ता. २४) आयोजन केले आहे.
अयोध्या येथील श्रीराम जन्मभूमी ट्रस्टचे कोषाध्यक्ष, तसेच गीता परिवार व महर्षी वेदव्याज प्रतिष्ठान मथुरेचे संस्थापक परमपूज्य स्वामी गोविंददेव गिरीजी महाराज यांच्या हस्ते शुक्रवार सकाळी साडेनऊ वाजता हा सोहळा होणार आहे, अशी माहिती पुणे जिल्हा परिषदेचे माजी सदस्य प्रसन्न डोके, ज्ञानेश्वर देवस्थान ट्रस्टचे अध्यक्ष अविनाश कुऱ्हाडे, व्यवस्थापक कान्हू कुऱ्हाडे यांनी पत्रकार परिषदेत दिली.
याप्रसंगी पंचायत समितीचे माजी सदस्य नेताजी डोके, देवस्थान ट्रस्टचे उपाध्यक्ष, संदीप पाडेकर, सचिव जिवन शिंदे, खजिनदार संजय गुंजाळ, संतवाडी गावचे सरपंच नवनाथ निमसे, नागेश कुऱ्हाडे, सुनील जाधव, अमोल भुजबळ, संदीप निमसे, गणेश शेळके, होनाजी गुंजाळ, गणेश गुंजाळ, रवींद्र गुंजाळ, राकेश शेळके, गबाजी गुंजाळ, रोहिदास निमसे आदी उपस्थित होते.
यावेळी देवस्थान ट्रस्टचे अध्यक्ष कुऱ्हाडे यांनी सांगितले की, श्री रेडा समाधी मंदिर परिसरात सुरू असलेल्या विकासकामांचा एक महत्त्वाचा भाग म्हणून सुमारे अंदाजे पाच ते सहा कोटी रुपये खर्च करून विणामंडप बांधकाम सुरू आहे. याच अंतर्गत श्री गणेश व रिद्धी-सिद्धी मूर्तींचे पूजन तसेच धर्मध्वज प्रतिष्ठा हा महत्त्वाचा सोहळा आयोजित केला आहे.
या सोहळ्याचे आयोजन समस्त ग्रामस्थ आळे, संतवाडी, कोळवाडी व बारा बार्शीकर यांच्या संयुक्त सहकार्याने आणि श्री ज्ञानेश्वर महाराज देवस्थान ट्रस्ट (संस्था) यांच्या पुढाकाराने करण्यात आले आहे. परिसरातील सर्व भाविक भक्तांनी या सोहळ्यासाठी उपस्थित राहावे, असे आवाहन देवस्थान ट्रस्टच्या वतीने करण्यात आले आहे.