आळेफाटा, ता. १ : राजुरी येथे बिबट्याच्या हल्ल्यात पारडाचा मृत्यू झाल्याची घटना शुक्रवारी (३१ आॅक्टोबर) रात्रीच्या सुमारास घडली. याबाबत मिळालेल्या माहितीनुसार राजुरी (ता. जुन्नर) येथील लवणमळा मळ्यात राहात असलेले विक्रम ज्ञानदेव पिंगळे यांचा गाई व म्हशी पालनाचा व्यवसाय असून शुक्रवारी नेहमीप्रमाणे सायंकाळी गाई व म्हशी गोठ्यात बांधल्या. रात्री नऊ वाजण्याच्या सुमारास बिबट्याने गोठ्यात प्रवेश करत एका पारडावर हल्ला केला असता शेजारी असलेल्या इतर गाईंनी केलेल्या आवाजाने पिंगळे गोठ्याजवळ आले. त्यांना पारडावर हल्ला केल्याचे दिसल्याने ते मोठ्याने ओरडले. तेवढ्यात बिबट्याने पळ काढला, परंतु झालेल्या या हल्ल्यात पारडू मृत्युमुखी पडली असून घटनास्थळी वनविभागाच्या वतीने पंचनामा केला आहे.
दरम्यान राजुरी परिसरात दिवसेंदिवस बिबट्याचे पाळीव प्राण्यांवर हल्ले वाढतच चालले असून दररोज कुठे ना कुठे पाळीव प्राण्यांवर हल्ले होत असल्याने बिबट्यांना पकडण्यासाठी वनविभागाने या परिसरात पिंजऱ्यांची संख्या वाढवावी, अशी मागणी पुणे जिल्हा परिषदेच्या माजी सदस्य स्नेहल शेळके यांनी वन विभागाकडे केली आहे.