आळेफाटा, ता. १५ : वडगाव आनंद (ता.जुन्नर) येथील आदित्य संतोष भुजबळ (वय २७) हा तरुण मोटारसायकलवरून शनिवारी (ता. १५) रात्री आठ वाजण्याच्या सुमारास काम उरकून घरी येत होता. वस्तीजवळ आल्यानंतर अचानक बिबट्याने त्याच्यावर हल्ला केला व पायाला चावा घेतला.
बिबट्याच्या हल्ल्यात संतोष भुजबळ गंभीर जखमी झाला असून, त्याच्यावर आळेफाटा येथील खासगी दवाखान्यात उपचार सुरू आहेत. तसेच याच ठिकाणी काही भुजबळ यांच्यावर हल्ला झाल्यानंतर काही वेळातच अविनाश सुरेश औटी (वय ३५) हे देखील दुचाकीवरून जात असताना त्यांच्यावर देखील बिबट्याने हल्ला केला. मात्र, ते या हल्ल्यातून थोडक्यात बचावले.
दरम्यान, याच गावात शुक्रवारी (ता. ७) प्रणव शिंदे या तरुण मोटर सायकल वरून घरी जात असताना अचानकपणे हल्ला करून गंभीर जखमी केल्याची घटना ताजी असताना शनिवारी पुन्हा दोन तरुणांवर बिबट्याने हल्ला केल्याने या परिसरात भीतीचे वातावरण पसरले आहे. वनविभागाने या ठिकाणी पिंजऱ्यांची संख्या वाढवून या ठिकाणी असलेल्या बिबट्यांना त्वरित पकडावे, अन्यथा आळेफाटा या ठिकाणी रास्ता रोको आंदोलन करण्यात येईल असा कडक इशारा येथील नागरिकांच्या वतीने पंचायत समितीचे माजी सदस्य जीवन शिंदे, वडगाव आनंद गावचे उपसरपंच गणेश भुजबळ, ऋषिकेश गडगे, प्रमोद गडगे यांनी दिला आहे.