आळेफाटा, ता.२३ : बाजारभाव घसरल्याने झेंडू उत्पादक शेतकरी संकटात सापडला आहे. उत्पादन तसेच वाहतूक खर्च निघत नसल्याने जुन्नर तालुक्याच्या पूर्व भागातील शेतकऱ्यांनी झेंडूची तोडणी बंद केली आहे.
डिसेंबर महिन्यात लग्नसराई, तसेच ग्रामीण भागातील यात्रौउत्सवाला सुरुवात होत असते. त्यामुळे फुलांना मोठी मागणी असते. जुन्नरच्या पूर्व भागातील राजुरी, वडगाव आनंद, बोरी बुद्रूक, साळवाडी, जाधववाडी वडगाव कांदळी या परिसरातील काही शेतकरी झेंडूचे उत्पादन घेत असतात. सध्या या परिसरात झेंडूच्या बागा चांगल्या प्रमाणात फुलल्या आहेत.

झेंडूच्या तोडणीसाठी दररोज दीडशे ते दोनशे रुपये मजुरी तसेच वाहतूक खर्चापोटी असा सुमारे अडीचशे रुपये खर्च करावे लागतात. सध्या फुलांना प्रतिकिलोस २० ते २५ रुपये बाजारभाव मिळत आहे. त्यामुळे फुलांची तोडणी करणे परवडत नसल्याने शेतकऱ्यांनी तोडणी थांबविली आहे. सध्या चांगली फुले फुलली असूनसुध्दा योग्य बाजारभावाअभावी ती सोडून देण्याची वेळ शेतकऱ्यांवर आली आहे.

07491