पारगाव, ता. १५ : पहाडदरा (ता. आंबेगाव) येथील ठाकरवाडीत अतिवृष्टी होऊन जमीन खचून बबन सखाराम कडाळे यांचे राहते घर कोसळून जमीनदोस्त झाले. घराचे पत्रे पलंगावर पडल्याने पलंगाच्या आडोशाला असलेल्या जागेत असलेल्या आरती रवींद्र कडाळे व त्यांची लहान मुले श्रावणी, सुवर्णा, अरिहंत थोडक्यात बचावली. त्यातील आरती व श्रावणी या दोघींना किरकोळ जखमा झाल्या. संपूर्ण घर जमीनदोस्त झाल्याने घरातील कपडे, संसारपयोगी साहित्य, धान्य हे सर्व घराखाली गाडल्याने मोठे नुकसान झाले.
पहाडदरा परिसरात रविवारी रात्रीपासून जोरदार पाऊस पडत आहे. येथील ठाकरवाडीत डोंगराच्या कुशीत आदिवासी ठाकर समाजातील अनेकांची घरे आहेत. सोमवारी सकाळी नऊ वाजण्याच्या सुमारास बबन कडाळे, त्यांची पत्नी बायजाबाई व मुलगा रवींद्र हे तिघे घराच्या बाहेर अंगणात काम करत होते, तर घरात रवींद्र यांची पत्नी आरती, त्यांची तीन लहान मुले श्रावणी (वय ७), सुवर्णा (वय ५), अरिहंत (वय दीड) हे चौघे होते. सकाळी नऊ वाजण्याच्या सुमारास डोंगराच्या उताराला असलेल्या घराच्या लगतची जमीन खचून घर कोसळून जमीनदोस्त झाले. घराचे पत्रे पलंगावर पडल्याने पलंगाच्या आडोशाला मोकळ्या जागेत असलेल्या आरती, श्रावणी, सुवर्णा, अरिहंत हे थोडक्यात बचावले. आरती व श्रावणी या दोघींना किरकोळ जखमा झाल्या आहेत. परंतु घरातील कपडे, संसारपयोगी साहित्य, धान्य हे सर्व घराखाली गाडल्याने कुटुंब उघड्यावर आले आहे. पारगाव कारखाना पोलिस ठाण्याचे सहाय्यक पोलिस निरीक्षक नेताजी गंधारे यांनी घटनास्थळी भेट देऊन कडाळे कुटुंबाची विचारपूस करून माहिती घेतली.
दरम्यान, हे कुटुंब आदिवासी समाजातील असून त्यांची आर्थिक परिस्थिती हलाखीची असल्याने शासनाने नुकसानीचे पंचनामे करून तातडीने मदत करावी, तसेच स्वयंसेवी संस्थांनी आर्थिक तसेच वस्तू रूपाने मदत करावी, असे आवाहन माजी पंचायत समिती सदस्य रवींद्र करंजखेले यांनी केले.