पारगाव, ता. २१ : पोंदेवाडी (ता. आंबेगाव) परिसरातील नागरिकांना आरोग्य सेवांसाठी सहा किलोमीटर अंतरावरील शिंगवे प्राथमिक आरोग्य केंद्रात जावे लागत असल्याने मोठी गैरसोय होत आहे. यामुळे पोंदेवाडी गाव पुन्हा पूर्वीप्रमाणे धामणी प्राथमिक आरोग्य केंद्रात समाविष्ट करण्याची मागणी आंबेगाव खरेदी विक्री संघाचे माजी अध्यक्ष अनिल वाळुंज यांनी केली आहे.
पूर्वी पोंदेवाडी गावाला धामणी प्राथमिक आरोग्य केंद्रातून आरोग्यसेवा मिळत होत्या. मात्र, आता हे गाव शिंगवे प्राथमिक आरोग्य केंद्राशी जोडले गेले आहे. पोंदेवाडीपासून शिंगवे हे अंतर सहा किलोमीटर आहे. यामुळे नागरिकांना नाहक त्रास सहन करावा लागत आहे.
दूरच्या अंतरामुळे महिला, ज्येष्ठ नागरिक, गरोदर माता, लहान बालक यांना उपचारासाठी, लसीकरणासाठी मोठ्या अडचणींचा सामना करावा लागतो. याउलट, धामणी प्राथमिक आरोग्य केंद्र केवळ दीड ते दोन किलोमीटर अंतरावर असल्याने तिथे जाणे सोयीस्कर आहे. या समस्येकडे प्रशासनाचे लक्ष वेधण्यासाठी पोंदेवाडी ग्रामपंचायतीने आंबेगाव तालुका आरोग्य अधिकारी यांना निवेदन दिले असल्याचे उपसरपंच महेंद्र पोखरकर यांनी सांगितले.
याबाबत आंबेगाव तालुका वैद्यकीय अधिकारी डॉ. तुषार पवार यांच्याशी संपर्क साधला असता त्यांनी सांगितले की, पोंदेवाडी गाव जरी शिंगवे प्राथमिक आरोग्य केंद्राला जोडले असले तरी पोंदेवाडी परिसरातील नागरिक उपचारासाठी धामणी केंद्रात जाऊ शकतात. त्यांना कोणतीही अडचण येणार नाही. तसेच, नागरिकांच्या मागणीवर काय विचार करता येईल याबाबत वरिष्ठांशी चर्चा करून निर्णय घेऊ.