पारगाव, ता. ३० : लाखणगाव (ता. आंबेगाव) येथील बेल्हे- जेजुरी महामार्गावरील घोड नदीवरील नवीन पुलाचे अपूर्ण काम तातडीने सुरु करा, तसेच जुन्या पुलाची त्वरित दुरुस्ती करून वाहतूक सुरळीत करा, अन्यथा संबंधित विभागाच्या अधिकाऱ्यांना जल समाधी देऊ, असा इशारा शिवसेना उद्धव बाळासाहेब ठाकरे पक्षाचे जिल्हाप्रमुख सुरेश भोर यांनी दिला.
या महिन्यात दोनदा नदीला आलेल्या पुरामुळे मोठ्या प्रमाणात पुलाचे नुकसान झाल्याने खबरदारी म्हणून हा पूल वाहतुकीसाठी बंद केला आहे. मंगळवारी सकाळी भोर यांनी नुकसान झालेल्या जुन्या पुलाची, तसेच अर्धवट अवस्थेत बंद पडलेल्या नविन पुलाच्या कामाची पाहणी केली. तसेच सार्वजनिक बांधकाम विभागाचे कार्यकारी अभियंता मिलिंद बारबाही यांच्याशी भ्रमणध्वनीवर संपर्क करून जुन्या पुलाची तातडीने दुरुस्ती करून नवीन पुलाचे बंद पडलेले काम तातडीने सुरु करावे, अन्यथा शिवसेना उद्धव बाळासाहेब ठाकरे पक्षाच्या वतीने रस्त्यावर उतरून तीव्र आंदोलन करण्यात येईल, असा इशारा दिला. यावेळी तालुका समन्वयक बाळासाहेब रोडे, विभाग प्रमुख माऊली पाटी, मार्तंड टाव्हरे, किसन टाव्हरे, नरेंद्र भागवत उपस्थित होते.