आपटाळे, ता. २७ ः मराठी भाषेला अभिजात भाषेचा दर्जा मिळाल्याने मराठी अधिक समृद्ध होण्यासाठी मदत मिळेल. विद्यार्थ्यांनी शालेय जीवनातच वाचनाची आवड निर्माण करावी त्यासाठी वर्तमानपत्रे, गोष्टीची पुस्तके अधिकाधिक वाचावीत. त्यामुळे विद्यार्थ्यांचे ज्ञान समृद्ध होण्यास मदत होईल, असे प्रतिपादन प्रसिद्ध कवी व साहित्यिक उत्तम सदाकाळ यांनी केले.
जुन्नर येथील अण्णासाहेब आवटे विद्यामंदिर येथे शुक्रवारी (ता. २६) मराठी विभागाच्या वतीने मराठी भाषेस अभिजात दर्जा मिळाल्याबद्दल ‘कवी आपल्या भेटीला’ या उपक्रमाचे आयोजन करण्यात आले होते. या प्रसंगी विद्यार्थ्यांना मार्गदर्शन करताना सदाकाळ बोलत होते. सदाकाळ यांनी विद्यार्थ्यांना मराठी भाषेचा इतिहास, मराठी भाषा अधिक समृद्ध करण्यासाठी काय करावे लागेल याचे महत्त्व सांगितले तर विविध कविता व कथांच्या माध्यमातून विद्यार्थ्यांना प्रोत्साहन दिले. महाराष्ट्राचे तत्कालीन राज्यपाल सी. पी. राधाकृष्णन यांनी स्वातंत्र्य दिनाच्या निमित्ताने पुणे येथील राजभवन येथे उत्तम सदाकाळ यांना विशेष अतिथी म्हणून निमंत्रित केल्याबद्दल विद्यालयाच्या वतीने सदाकाळ यांचा विशेष सन्मान करण्यात आला.
या प्रसंगी विद्यालयात ग्रंथ प्रदर्शन, निबंध स्पर्धा, वक्तृत्व स्पर्धा, काव्यवाचन, हस्ताक्षर, कथाकथन स्पर्धा या उपक्रमांचे आयोजन करण्यात आले होते. मुख्याध्यापिका संगीता बारवे, पर्यवेक्षक अनिल शिंदे, मराठी विभाग प्रमुख सुनीता निलख, प्रियांका वर्पे यांसह विद्यार्थी यावेळी उपस्थित होते.