जुन्नर, ता. २६ : येणेरे (ता. जुन्नर) येथील प्राथमिक आरोग्य केंद्रातील महिला कर्मचाऱ्यांना लज्जा उत्पन्न होईल, असे वर्तन केल्याबद्दल संजय शांताराम नवले (रा. येणेरे, ता. जुन्नर) यांच्याविरोधात जुन्नर पोलिस ठाण्यात गुन्हा दाखल करण्यात आला आहे. या घटनेची फिर्याद वैद्यकीय अधिकारी यांनी दिली आहे. याबाबत सविस्तर माहिती अशी की, मंगळवारी (ता. २५) सायंकाळी साडेपाचच्या सुमारास संजय शांताराम नवले हा येणेरे येथील प्राथमिक आरोग्य केंद्रामध्ये उपचार घेण्यासाठी आला असता त्याने महिला कर्मचाऱ्यांना अश्‍लील भाषेचा वापर करून या कर्मचाऱ्यांकडे एकटक नजरेने पाहून लज्जा उत्पन्न होईल, असे वर्तन केल्याचे फिर्यादीत नमूद केले आहे. पुढील तपास पोलिस निरीक्षक किरण अवचर यांच्या मार्गदर्शनाखाली करण्यात येत आहे.