जुन्नर, ता. २७ : धामणखेल (ता. जुन्नर) येथे चंपाषष्ठी निमित्ताने खोबरं-भंडाऱ्याची उधळण करीत आणि ‘सदानंदाचा येळकोट, येळकोट जय मल्हार’चा गजर देत हजारो शेकडो भाविकांनी मार्तंड खंडेरायाचे दर्शन घेतले. चंपाषष्ठी निमित्ताने बुधवार (ता. १९) ते बुधवार (ता. २६) या कालावधीत अखंड हरिनाम सप्ताह झाला. या महोत्सवात विविध धार्मिक कार्यक्रम पार पडले. यामध्ये महाआरती, होमहवन, पालखी मिरवणूक काढण्यात आली. विशाल महाराज हाडवळे यांच्या हरिकीर्तनाने सप्ताहाची सांगता झाली. भाविकांसाठी महाप्रसाद देण्यात आला.
खंडेरायाचे तळीभंडार, जागरण गोंधळ करत दिवटी-दीपमाळ प्रज्वलित करून भक्तिमय वातावरणात चंपाषष्ठीचा उत्सव साजरा केल्याची माहिती देवस्थानचे अध्यक्ष राजू कोंडे, सरपंच अभिषेक वर्पे यांनी दिली. या परिसरात बिबट्याची दहशत असल्याने वाडीवस्तीवरुन कीर्तनासाठी येणाऱ्या ग्रामस्थांसाठी वाहनाची व्यवस्था केली होती.