भुकूम, ता. १ : खासदार सुप्रिया सुळे यांचा वाढदिवस मुठा खोऱ्यात दहा हजार वह्यांचे वाटप करून साजरा करण्यात आला. पक्षाचे तालुकाध्यक्ष महादेव कोंढरे यांच्यावतीने आंदगाव (ता. मुळशी) येथे वह्या देण्यात आल्या. कोंढरे म्हणाले, ‘‘फ्लेक्सबाजी करण्यापेक्षा सामाजिक उपक्रम राबवून नेत्यांचे वाढदिवस साजरे करण्यात आनंद आहे. खासदारांकडून यापूर्वी आंदगाव हायस्कूलला मोठा निधी मिळाला आहे. शैक्षणिक उपक्रम, गोरगरीब विद्यार्थ्यांना मदत असे उपक्रम दरवर्षी राबविले जातात. विना अनुदानित शिक्षकांच्या मानधनासाठी विशेष प्रयत्न करण्यात येतील.’’
याप्रसंगी कोळावडे, खारवडे, कोंढूर, मुठा व खोऱ्यातील सर्व प्राथमिक शाळेतील विद्यार्थ्यांना वह्या वाटप करण्यात आल्या. आंदगाव हायस्कूलला कोंढरे यांच्याकडून एक हजार व रोटरी क्लब ऑफ कोरेगाव यांच्याकडून अडीच हजार वह्यांचे वाटप केले. यावेळी सरपंच शिवाजी झुंझुरके, उपसरपंच सारिका गुजर, माजी सरपंच कैलास मारणे, प्रफुल्ल मारणे, सारिका वैद्य, लक्ष्मण मरगळे, मुख्याध्यापक एस. सावंत, मंगेश आव्हाड आदी उपस्थित होते.