भिगवण, ता. ११ : भिगवण- राशीन रस्त्यावर मदनवाडी चौफुला (ता. इंदापूर) येथे कॅरी वाहनाची दुचाकीला धडक बसून झालेल्या अपघातात दुचाकीस्वाराचा मृत्यू झाला, तर दुचाकीवरील आणखी एक जण गंभीर जखमी झाला आहे. या अपघातामध्ये गणेश सुखदेव जाधव (वय ३१, रा. शेटफळगढे, ता. इंदापूर) यांचा जागीच मृत्यू झाला, तर ओम अशोक जाधव (वय १०, रा. भकासवाडी तक्रारवाडी, ता. इंदापूर) हा जखमी झाला आहे.
मदनवाडी चौफुला येथे रविवारी (ता. १०) रात्री नऊच्या सुमारास भिगवणहून राशीनवर निघालेल्या भरघाव मारुती सुझुकी कंपनीच्या कॅरी वाहनाची (क्र. एम.एच. १२ व्ही.टी. ९६४२) गणेश सुखदेव जाधव याच्या दुचाकीस (क्र. एम.एच. ४२ ए,जे. ७९५१) पाठीमागुन जोरात धडक बसली. या अपघातामध्ये मोटार सायकल चालक गणेश जाधव याच्या डोक्यास, हाता-पायास मार लागुन जागीच मृत्यू झाला, तर मोटार सायकलवरील ओम अशोक जाधव जखमी झाला आहे.
याप्रकरणी पोलिसंनी कॅरी वाहनाचा चालक सतीश शंकर धेंडे (रा. कासेवाडी, पुणे) यांच्याविरुध्द गुन्हा दाखल केला आहे. अधिक तपास येथील भिगवण पोलिस ठाण्याचे सहाय्यक पोलिस निरीक्षक विनोद महांगडे यांचे मार्गदर्शनाखाली पोलिस हवालदार उगले करीत आहेत.

अपघाताचे केंद्र
भिगवण- बारामती रस्त्याचे नुकतेच कॉंक्रीटीकरणासह विस्तार करण्यात आला आहे. या रस्त्यावरील वाढलेली रहदारी, वाहतुकीच्या नियमांकडे वाहन चालकांकडुन करण्यात येत असलेले दुर्लक्ष, मदनवाडी चौकामध्ये उभी असलेली अवैध प्रवासी वाहने, तसेच रस्त्याचे काम करत असताना अनेक ठिकाणी ये-जा करण्यासाठी ठेवण्यात आलेल्या जागांमुळे हा रस्ता अपघाताचे केंद्र बनत आहे. प्रशासनाने याकडे लक्ष तातडीने देण्याची आवश्यकता नागरिकांमधुन व्यक्त होत आहे.