भोर, ता. ७ : ‘‘मतदानापूर्वी मतदारांनी पैसे वाटल्याच्या तक्रारीवर पोलिसांनी रीतसर गुन्हा दाखल करून कारवाई केली नाही, तर आम्ही पोलिस ठाण्यासमोर आंदोलन करण्यास ठाम आहे,’’ असे महाविकास आघाडीच्यावतीने आमदार संग्राम थोपटे यांनी पुन्हा एकदा शुक्रवारी (ता. ७) घेतलेल्या पत्रकार परिषदेत ठणकावून सांगितले. तसेच, महायुतीच्यावतीने जिल्हा परिषदेचे माजी उपाध्यक्ष रणजित शिवतरे यांनी केलेल्या आरोपांचे खंडनही केले.
आमदार थोपटे म्हणाले, ‘‘महायुतीच्यावतीने पत्रकार परिषद घेऊन माझ्यावर राजकीय स्टंटबाजी करण्याचा आरोप केला. हे त्यांचे अज्ञान असून, ते राजकीयदृष्ट्या अपरिपक्व आहेत. मूळ मुद्दा बाजूला ठेवून ते भोर शहरातील अवैध धंद्याबद्दल आणि बांधकामाबद्दल बोलत आहेत. आम्ही कोणत्याही अवैध व्यवसायाला पाठीशी घालत नाही. तालुक्यातील महायुतीच्या पदाधिकाऱ्यांच्या प्रभागात खासदार सुप्रिया सुळे यांना मताधिक्य मिळाले. त्यामुळे ते वरिष्ठांना आपले राजकीय अस्तित्व दाखविण्यासाठी चिखलफेक करीत आहेत. पोलिसांनी मावळ तालुक्यातील गाड्या भोरमध्ये कशासाठी आल्या? कुठे थांबल्या आणि त्यांनी कोणाकोणाला फोन केले? याची चौकशी करावी, अशी आमची मागणी आहे.’’
‘‘भोरचे राष्ट्रवादी कॉंग्रेसचे माजी नगरसेवक यशवंत डाळ यांनी शहरात अवैध बांधकामे केलेली आहेत. त्यांना नगरपालिका प्रशासनाने नोटीसही दिलेली आहे. परंतु, तेच आता अवैध बांधकामावर बोलून जनतेचे लक्ष विचलीत करण्याचा प्रयत्न करत आहेत,’’ असे आमदार थोपटे यांनी सांगितले.
यावेळी राष्ट्रवादी कॉंग्रेस शरदचंद्र पवार पक्षाचे तालुकाध्यक्ष रवींद्र बांदल, कॉंग्रेसचे तालुकाध्यक्ष शैलेश सोनवणे, मानसिंग धुमाळ, विठ्ठल शिंदे, संदीप नांगरे, विठ्ठल आवाळे, बाळासाहेब थोपटे, सचिन हर्णसकर, गणेश पवार, समीर सागळे, सुमंत शेटे आदी उपस्थित होते.