भोर, ता. ५ : कापूरहोळ-भोर-मांढरदेवी-वाई-सुरूर या मार्गाच्या क्रॉंक्रीटीकरणाचे काम वर्षभरापासून सुरु आहे. मात्र भाटघर-बुवासाहेबवाडी-भोलावडे ते एसटी स्टँड या ठिकाणच्या रस्त्याचे काम अपूर्ण अवस्थेत आहे. पावसामुळे या मार्गावर असंख्य खड्डे पडले आहेत. या भागात भोर एज्युकेशन सोसायटीचे राजा रघुनाथराव विद्यालय आणि विद्या प्रतिष्ठानची भोर इंग्लिश मीडियम स्कूल या दोन मोठ्या शाळा आहेत. याशिवाय भोरहून पुणे, पसुरे, पांगारी, भुतोंडे आणि महुडे या भागात जाणारी वाहनेही याच मार्गावरून जातात. यामुळे या ठिकाणी नेहमी वर्दळ असते. परंतु या भागातून जाताना नागरिकांबरोबर विद्यार्थ्यांनाही त्रास होत आहे. याकडे प्रशासनाचे लक्ष वेधून घेण्यासाठी दोन्ही विद्यालयांच्या प्रशासनाने मंगळवारी (ता. ५) सकाळी भोलावडे गावच्या हद्दीत दीड तास रास्ता रोको आंदोलन केले.

येथील रस्त्यावरील खड्यांत सायकली, दुचाकी आणि मोटारी अडकून अपघात घडले आहेत. वाहनांमुळे चालत आणि सायकलवर जाणाऱ्या विद्यार्थ्यांच्या अंगावर खड्यातील घाण पाणी उडणे, वाहने एकमेकांना घासून वाद निर्माण होत आहेत. अनेकवेळा विनंती करूनही या रस्त्याचे काम पूर्ण करण्यासाठी संबंधित ठेकेदार आणि सार्वजनिक बांधकाम विभाग दुर्लक्ष करीत आहे. याकडे प्रशासनाचे लक्ष वेधून घेण्यासाठी दोन्ही विद्यालयांच्या प्रशासनाने मंगळवारी सकाळी ११ वाजता राजा रघुनाथराव विद्यालयासमोर तीन हजार विद्यार्थी, चारशे शिक्षक आणि भोलावडे पंचक्रोशीतील हजारो नागरिकांनी रास्ता रोको करण्यास सुरुवात केली. यामध्ये राजकीय पक्षांच्या पदाधिकारी व कार्यकर्तेही सहभागी झाले. भोर एज्युकेशन सोसायटीचे अध्यक्ष प्रमोद गुजर, सचिव डॉ. सुरेश गोरेगावकर, सुरेश शहा, सरपंच प्रवीण जगदाळे, उपसरपंच प्रशांत पडवळ, राष्ट्रवादीचे माजी नगरसेवक यशवंत डाळ, सकल मराठा समाजाचे अध्यक्ष संजय भेलके, सोमनाथ ढवळे, बाबू शेटे, दत्ता मोरे, उदय गुठाळकर, राष्ट्रवादीचे तालुकाध्यक्ष संतोष घोरपडे, मुख्याध्यापिका अश्विनी मादगुडे, मुख्याध्यापक लक्ष्मण भांगे, आनंदा खंडाळे, तानाजी चंदनशीव, पंकड धुमाळ, नितीन सोनवले, निलम झांजले, माऊली खुटव़ड, रामदास भोंडवे, सूर्यकांत माने, रमेश झांजले, सर्जेराव बो़डके, अशोक बोडके, नितीन सोनवले, विठ्ठल आवाळे सहभागी झाले होते.

मंगळवारी आठवडे बाजार असल्यामुळे बाजारात खरेदी-विक्रीसाठी आलेल्यांनीही आंदोलनात सहभाग घेतला. तहसीलदार राजेंद्र नजन यांनी सार्वजनिक बांधकाम विभागाचे उपअभियंता राजसाहेब आजळे, योगेश मेटेकर, प्रकाश जाधवर आणि ठेकेदार यांच्याशी चर्चा करून एका महिन्याच्या आत रस्त्याची किमान एक बाजू तरी पूर्ण करण्याचे आदेश दिले. भाटघर-भोलावडे ते भोर या मार्गावरील काळी माती उकरणे, महावितरणचे खांब हटविणे, पाण्याच्या योजनांचे पाइप हलविणे आणि सुरु असलेला मान्सूनचा पाऊस यामुळे रस्त्याचे काम करण्यास उशीर होत असल्याचे सार्वजनिक बांधकाम विभागाकडून सांगण्यात आले.

भाटघर-बुवासाहेबवाडी-भोलावडे या मार्गाचे काम हे संथगतीने सुरू असून या ठिकाणी वाहतुकीसाठी पर्यायी रस्ता (परावर्तित मार्ग) देखील सुस्थितीत केलेला नाही. तक्रारी करूनही दखल न घेतल्यामुळे नाइलाजास्तव आम्हाला विद्यार्थ्यांसह आंदोलन करावे लागले. एक महिन्याच्या आत रस्त्याची एक बाजू वाहतुकीसाठी सुरळीत न केल्यास पुन्हा आंदोलन करणार आहे.
- प्रवीण जगदाळे, सरपंच भोलावडे.