विजय जाधव
भोर : नेरे (ता.भोर) येथील प्राथमिक आरोग्य केंद्राला शासनाकडून ‘मॉडेल प्राथमिक आरोग्य केंद्र’ बनविण्यासाठी इमारतीचे बांधकाम सुरू असल्याने रुग्णांसह कर्मचाऱ्यांना त्रासाला सामोरे जावे लागत आहे. मॉडेल प्राथमिक आरोग्य केंद्रासाठी नूतनीकरण करण्यात येणार असल्याचे माहिती असूनही आरोग्य विभागाने रुग्णांना आरोग्य सुविधा देण्यासाठीच्या ठिकाणाचे योग्य प्रकारे नियोजन केले नाही. त्यामुळे आरोग्य सेवा धोक्यात आली आहे. सोमवारी (ता.३) आरोग्य केंद्रात उपचार घेण्यासाठी आलेल्या रुग्णांना धुळीमुळे ताटकळत थांबावे लागले.
प्राथमिक आरोग्य केंद्रातील फार्मासिस्ट शीतल शेंडे आणि नर्सिंग सुपरवायझर शीतल कुंभार सोमवारी सकाळी सव्वानऊ वाजता केंद्रावर उपस्थित होत्या. मात्र वैद्यकीय अधिकारी मयूरेश कांबळे यांच्यासह इतर सर्व जण १० वाजण्याच्या सुमारास पोहोचले. नेरे केंद्रात वैद्यकीय अधिकारी प्रेमला कांबळे या प्रमुख वैद्यकीय अधिकारी असून इतर १० जण कार्यरत आहेत. यामध्ये आरोग्य सेविका, आरोग्य सेवक, कारकून, प्रयोगशाळा सहाय्यक, फार्मासिस्ट, शिपाई व चालक आदींचा समावेश आहे. नेरे आरोग्य केंद्राअंतर्गत शिंद, उत्रौली, पसुरे, पांगारी व वेळवंड ही पाच उपकेंद्रे असून ४५ गावांमधील सुमारे ३५ हजार नागरिकांना सेवा दिली जात आहे. उपकेंद्रासाठी तीन आरोग्य सेविका आणि दोन सेवकांच्या जागा रिक्त आहेत.

ओपीडीसाठी नियोजनच नाही
केंद्राच्या शेजारीच असलेल्या कर्मचाऱ्यांच्या निवासस्थानात काही साहित्य ठेवण्यात आले आणि एका खोलीत बांधकाम कर्मचाऱ्यांची राहण्याची सोय केली, मात्र प्राथमिक आरोग्य केंद्राची ओपीडी (बाह्यरुग्ण विभाग)साठी जागेचे नियोजन केले नाही. याबाबत विचारणा केल्यानंतर प्रशासनाने कर्मचाऱ्यांच्या निवासस्थानातील एक खोली रिकामी करून तिथे ओपीडी सुरू केली. डॉ. प्रेमला कांबळे यांनी ग्रामपंचायत आणि प्राथमिक शाळेची जागा मिळण्यासाठी पत्रव्यवहार केला असल्याचे सागितले. मात्र त्यावर काही ठोस निर्णय झालेला नाही.

नेरे प्राथमिक आरोग्य केंद्रातून आवश्यक त्या रुग्णांना दर १० ते १५ दिवसांनंतर रक्तदाब (बीपी) आणि मधुमेह (डायबिटीस) च्या गोळ्या मिळत आहेत. गोळ्या संपल्यामुळे सोमवारी मी गोळ्या घेण्यासाठी आले होते.
- शेवंताबाई वरे (वय ७०), रुग्ण, वरोडी खुर्द

इमारतीच्या बांधकामामुळे रुग्णांना सेवा देण्यासाठी हालचाली सुरू केल्या आहेत. नेरे गावातील जुन्या प्राथमिक आरोग्य केंद्राच्या जागेत किंवा कर्मचाऱ्यांच्या निवासस्थानात योग्य प्रकारचे नियोजन दोनच दिवसांत केले जाणार आहे.
- डॉ. अभय तिडके, तालुका वैद्यकीय अधिकारी, भोर