भोर, ता. २९ : निवडणुकीच्या काळात शहरात शांतता व सुव्यवस्था राहण्यासाठी पोलिसांनी शनिवारी (ता. २९) शहरातून पथसंचलन केले.
भोर पोलिस ठाण्याचे पोलिस निरीक्षण अण्णासाहेब पवार यांच्या मार्गदर्शनाखाली काढलेल्या या पथसंचलनात ४ पोलिस अधिकाऱ्यांसह ६० पोलिस कर्मचारी सहभागी झाले. यामध्ये पुणे स्ट्रायकींग फोर्स, ग्रामीण पोलिस अधिकक्ष मुख्यालयातील राखीव दलाचे जवान आणि सेंट्रल रिझर्व पोलिस फोर्सच्या जवानांचा समावेश आहे. शनिवारी सकाळी १० वाजता पोलिस ठाण्यापासून या पथसंचलनास सुरुवात झाली. चौपाटी, शिवाजी पुतळा रोड, नगरपालिका चौक, मंगळवार पेठ, सुभाष चौक, राजवाडा रोड, नवी आळीमार्गे पुन्हा पोलिस ठाण्यात पथसंचलनाचा समारोप झाला. निवडणुकीच्या काळात राजकीय पक्षांचे पदाधिकारी व कार्यकर्त्यांसह मतदारांनी व नागरिकांनी शांतता पाळावी आणि कायद्याचे पालन करावे, असे आवाहन पोलिसांकडून करण्यात आले.