बारामती, ता. १२ : येथील उपविभागीय पोलिस अधिकारी कार्यालय येत्या स्वातंत्र्यदिनापर्यंत बारामती शहर पोलिस ठाण्याच्या इमारती शेजारी असलेल्या अतिरिक्त पोलिस अधीक्षक कार्यालयात स्थलांतरित होणार आहे.
या संदर्भात उपमुख्यमंत्री अजित पवार यांच्या निर्देशानुसार उपविभागीय पोलिस अधिकारी या इमारतीतून कामकाज करणार आहेत. बारामती शहरातील तारा चित्रमंदीरसमोरील पोलिस लाइनच्या वसाहतीमध्ये काही वर्षांपूर्वी उपविभागीय कार्यालयाची इमारत उभारण्यात आली होती.
या पार्श्वभूमीवर फक्त उपविभागीय पोलिस अधिकारी कार्यालयच जुन्या जागेतून कामकाज करत होते. अतिरिक्त पोलिस अधीक्षकांसाठी शहर पोलिस ठाण्याशेजारीच सुसज्ज कार्यालय उभारण्यात आले आहे. मात्र, अतिरिक्त पोलिस अधीक्षक बऱ्हाणपूर (ता. बारामती) येथील पोलिस उपमुख्यालयात बसूनच कामकाज करतात. त्यामुळे ही इमारत उभारल्यापासून बंद अवस्थेतच होती.
उपविभागीय पोलिस अधिकाऱ्यांना कामकाज करताना सुसज्ज कार्यालय असणे ही गरज ओळखून पवार यांनी बारामतीचे उपविभागीय पोलिस अधिकारी डॉ. सुदर्शन राठोड यांना नवीन कार्यालयात स्थलांतरित होण्याच्या सूचना केल्या आहेत. त्यानुसार येत्या काही दिवसात नव्या कार्यालयातून त्यांचे कामकाज होणार आहे.
बारामती शहर पोलिस ठाणे, वाहतूक शाखा व उपविभागीय पोलिस अधिकारी कार्यालय एकाच ठिकाणी आल्यामुळे लोकांना हेलपाटे मारावे लागणार नाहीत. यात वेळ व इंधन यांची बचत होणार आहे. दरम्यान, पोलिस लाइनमध्ये १९५ सदनिकांची भव्य पोलिस निवासी वसाहत उभारण्यात आली असून, या वसाहतीतील पोलिसांसाठी सुविधा इमारत उभारण्यासाठी उपविभागीय पोलिस अधिकारी कार्यालयाच्या जागेचा भविष्यात वापर केला जाण्याची शक्यता आहे.