बारामती, ता. १३ : ‘‘राज्य शासनाच्यावतीने ‘आई पर्यटन’ योजना सुरू करण्यात आली असून, त्याचा महिलांनी लाभ घ्यावा असे,’’ आवाहन शिवसेना जिल्हा प्रमुख सुरेंद्र जेवरे यांनी केले आहे.
पर्यटन क्षेत्रात महिलांमध्ये उद्योजकता व नेतृत्वगुण विकसित करण्याच्या हेतूने शासनाच्या पर्यटन विभागामार्फत महिलांच्या सक्षमीकरणासाठी आई महिला समावेशक पर्यटन धोरण जाहीर केले आहे. यानुसार महिलांना पर्यटन व्यवसाय करण्यासाठी चारचाकी वाहन घेण्यासाठी बिनव्याजी (१२ टक्क्यांपर्यंत- साडेचार लाखांपर्यंत व्याज माफ) १५ लाखांचे कर्ज उपलब्ध करून दिले जाणार आहे.
या शिवाय पर्यटन व्यवसायासंबंधित ४१ विविध योजना जाहीर करण्यात आल्या असून, त्याचाही महिलांनी लाभ घेण्याचे आवाहन जेवरे यांनी केले आहे. कॅरॅव्हॅन, साहसी पर्यटन, पर्यटक सुविधा केंद्र, कृषी पर्यटन केंद्र, रिसॉर्ट, हॉटेल, मोटेल, टेंट, ट्री हाऊस, व्होकेशनल हाऊस, पर्यटन व्हिला, वूडन कॉटेजेस, महिला चलित कॉमन किचन, टुरिस्ट ट्रान्स्पोर्ट ऑपरेटर, मेडिकल टुरिझम आदी व्यवसायांसाठी या योजना आहेत.
बारामतीत यासाठी नगरपरिषदेसमोर मदतकक्ष सुरू करण्यात आला आहे. अधिक माहितीसाठी ९८२२३०४५५६ या क्रमांकावर संपर्क साधण्याचे आवाहन केले आहे.