बारामती, ता. ५ : बारामती येथील विद्या प्रतिष्ठान संस्थेच्या कमलनयन बजाज इन्स्टिट्यूट ऑफ इंजिनिअरिंग अँड टेक्नॉलॉजीमध्ये ‘पॉश कायदा २०१३ आणि लैंगिक संवेदनशीलता’ या विषयावरील कथा अभिवाचनाचा एकपात्री प्रयोग व जनजागृती कार्यक्रम झाला. महाविद्यालयातील महिला कर्मचाऱ्यांसाठी असलेल्या अंतर्गत तक्रार समितीच्या वतीने या कार्यक्रमाचे आयोजन केले होते. कार्यक्रमात संदीप महाजन यांनी या कायद्याबाबत सविस्तर विवेचन केले. कामाच्या ठिकाणी महिलांच्या सुरक्षितेबाबत या कायद्यात असलेल्या तरतुदी, लैंगिक छळ झाल्यास तक्रार करण्याची व निवारणाची प्रक्रिया, महिलांसाठी सुरक्षित वातावरणाची निर्मिती याबाबत त्यांनी माहिती दिली. यावेळी प्राचार्य डॉ. सुधीर लांडे यांनी संदीप महाजन यांचा सत्कार केला.