बारामती, ता. ५ : बहुप्रतिक्षित नगरपरिषद निवडणुकीचा बिगूल वाजल्यानंतर बारामतीत आता इच्छुकांची लगबग सुरू झाली आहे. तब्बल नऊ वर्षांच्या कालखंडानंतर नगरपरिषद निवडणूक होत असल्याने इच्छुकांची संख्याही यंदा लक्षणीय असून नगराध्यक्ष पद खुले असल्याने बारामतीच्या प्रथम नागरिकाचा सन्मान प्राप्त करण्यासाठी यंदा मोठी चुरस पाहायला मिळणार आहे.
निवडणूक आयोगाने नगरपरिषद निवडणुकीचे वेळापत्रक जाहीर केल्यानंतर आता अवघ्या एका महिन्यात निवडणुकीची प्रक्रिया पार पडणार असल्याने इच्छुकांकडे तुलनेने वेळ कमी राहणार आहे. १० नोव्हेंबर पासून उमेदवारी अर्ज दाखल करता येणार असून १७ नोव्हेंबरपर्यंत ही मुदत आहे. २१ नोव्हेंबरला दुपारी बारामती नगर परिषद निवडणुकीतील प्रभागनिहाय उमेदवारीचे तसेच बारामतीच्या नगराध्यक्षपदाच्या शर्यतीत अंतिम उमेदवार कोण असतील हेही अंतिम चित्र स्पष्ट होईल. बारामती नगरपरिषदेची या पूर्वीची निवडणूक १४ डिसेंबर २०१६ ला झाली होती. तब्बल नऊ वर्षांच्या कालखंडानंतर ही निवडणूक होत असल्याने साहजिकच बारामतीकरांमध्ये उत्सुकता आहे. तीन वर्षांहून अधिक काळ नगर परिषदेवर प्रशासकराज आहे, आपल्या समस्या प्रभावीपणे मांडून त्या मार्गी लावण्यासाठी नगरसेवकांची आवश्यकता नागरिकांनाही गरजेची वाटू लागली आहे. इच्छुकांनी कागदपत्रांची जुळवाजुळव केलेली असून पक्षीय स्तरावरही प्रभागनिहाय उमेदवारांची चाचपणी सुरू झाली आहे. याबाबत उमेदवारी अर्ज मागे घेण्याच्या दिवशी प्रभागनिहाय अंतिम चित्र स्पष्ट होईल.

निवडणूक जाहीर झाल्याने आता आयोगाच्या निर्देशानुसार २४, ४८ व ७२ तासांमध्ये ज्याबाबी करणे गरजेच्या आहेत, त्या करण्याची प्रक्रिया पथके नेमून सुरू केली आहे. आचारसंहितेचे उल्लंघन होणार नाही याची काळजी घ्यावी.
- पंकज भुसे, मुख्याधिकारी