बारामती, ता. १८ : नगरपरिषदेच्या निवडणुकीमध्ये येथील प्रभाग दोन ‘अ’मधील उमेदवार राष्ट्रवादी कॉंग्रेसच्या उमेदवार अनुप्रीता रामलिंग तांबे यांचाच एकमेव उमेदवारी अर्ज दाखल झाल्याने त्यांची बिनविरोध निवड निश्चित आहे. त्यामुळे राष्ट्रवादीच्या गोटात जल्लोषाचे वातावरण होते.
या जागेवर विरोधकांकडून अर्जच न आल्याने राष्ट्रवादीच्या पारड्यात विनासायास ही जागा पडली. राष्ट्रवादी विरोधात विरोधी पक्षाला सर्व जागांवर उमेदवारच मिळाले नसल्याचे चित्र स्पष्ट झाले. भाजपकडून तीस जागांवर लढण्याचे निश्चित झाले असून, उर्वरित जागांवर राष्ट्रीय समाज पक्ष व काही ठिकाणी अपक्षांना पाठिंबा देत भाजप ही निवडणूक लढविणार आहे.
दुसरीकडे राष्ट्रवादी कॉंग्रेस शरदचंद्र पवार पक्षाची यादी जाहीर झालेली नाही. युतीसाठी पक्षाचे प्रयत्न सुरु असून लवकरच याबाबतची अंतिम घोषणा केली जाईल, असे सांगितले गेले. काही प्रभागात उमेदवारांची संख्या कमी असल्याने अर्ज माघारी घेण्याच्या दिवसापर्यंत अजून काही जागा बिनविरोध करता येतात का, याचा राष्ट्रवादीचा जोरदार प्रयत्न सुरु आहे.