चाकण, ता. १० : या विधानसभा निवडणुकीत उमेदवारांच्या खर्च मर्यादेत मागील खर्च मर्यादेपेक्षा बारा लाखाने वाढ करण्यात आली आहे. त्यामुळे चाळीस लाख रुपये विधानसभा निवडणुकीसाठी उमेदवाराला खर्च मर्यादा करण्यात आली आहे. मात्र, उमेदवार, कार्यकर्ते व पदाधिकारी प्रचारात मुक्तहस्ते खर्च करत आहेत. त्यामुळे ‘होऊ दे खर्च दणक्यात’ असे चित्र राज्यात आहे.
विधानसभा निवडणुकीसाठी उमेदवारांच्या खर्च मर्यादेत बारा लाखाने वाढ करण्यात आली आहे. गेल्या विधानसभा निवडणुकीत उमेदवारांची खर्च मर्यादा अठ्ठावीस लाख रुपये होती. ती आता चाळीस लाख रुपये झाली आहे. निवडणुकीदरम्यान निष्पक्षता राखण्यासाठी निवडणूक आयोग प्रत्येक उमेदवारासाठी निवडणुकीदरम्यान खर्चाची कमाल मर्यादा निश्चित करते. निवडणूक आयोगाच्या नियमांनुसार उमेदवारी अर्ज दाखल केल्यापासून प्रत्येक उमेदवाराला ४० लाखांची खर्च मर्यादा आहे.
निवडणुकीत बदलत्या काळानुसार खर्च वाढलेले आहेत. पूर्वी भेळ भत्यात निवडणूक व्हायची, आता भेळ भत्यात निवडणूक होत नाही. आता निवडणुकीचे खर्चाचे प्रकार अनेक आहेत. निवडणुकीचा खर्च मात्र कोट्यवधी रुपयांच्या घरात जातो, हे भयानक वास्तव आहे.
सर्व उमेदवारांनी मर्यादेपेक्षा जास्त खर्च होणार नाही, याची दक्षता घ्यावी. नवीन बँक खाते उघडून सदर खात्यातूनच खर्च करावा. आदर्श आचारसंहितेची योग्य अंमलबजावणी व्हावी. सर्वांना समान संधी मिळावी, यासाठी निवडणूक आयोगाने उमेदवाराला प्रचाराला किती खर्च करावा, याची मर्यादा घालून दिली आहे. परंतु, श्रीमंत, धनाढ्य उमेदवारांकडून अधिक खर्च करून फायदा उचलला जातो. उमेदवार व त्यांचे समर्थक कार्यकर्ते, पदाधिकारी छुप्या पद्धतीने मोठ्या प्रमाणात खर्च करतात. तो प्रत्यक्षात कागदावर येत नाही.
अनेक ठिकाणी सापडली रोकड
विधानसभा निवडणुकीत उमेदवाराची खर्च मर्यादा ४० लाख रुपयाची असली तरी उमेदवारांचे खर्च कोट्यवधी रुपयांच्या घरात जातात. मतदारांना प्रलोभने, मोठ्या प्रमाणात पैशाचे, दारू, विदेशी मद्य वाटप, आमिष म्हणून काही वस्तू भेट दिल्या जातात. महिलांना साडी व गृहपयोगी साहित्य दिले जाते. हॉटेल, ढाबे यावर जेवणावळी दिल्या जातात. प्रचारासाठी काही नागरिकांना पैसे देऊन सभेला आणले जाते. निवडणूक आयोगाचे नियम असताना प्रचारासाठी अनेक वाहने ठेवली जातात. प्रचार करण्याची साधने सध्या बदलली आहेत. त्यावरही मोठ्या प्रमाणात खर्च केला जातो. उमेदवारांचा प्रत्यक्ष खर्च कोट्यवधी रुपयांचा असतो, असे सामान्य मतदारांचे म्हणणे आहे. अनेक शहरात, गावांत पैसे वाटप करताना, तसेच वाहनातून लाखो रुपयांची रोकड नेताना पोलिसांना सापडली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.