चाकण, ता. २६ : कडाचीवाडी (ता. खेड) येथील बापदेव वस्तीवर एका आरोपीने मोटार लावण्यासाठी खंडणी मागितली. ती खंडणी देण्यास फिर्यादीने नकार दिला. त्यानंतर आरोपीने शिवीगाळ करून फिर्यादीला व त्याच्या मित्राला जबर मारहाण केली. फिर्यादीच्या घरासमोरील दुसऱ्या गाड्यांचेही नुकसान केले. तसेच फिर्यादीच्या भावाला लाकडी दांडक्याने मारहाण केली. याप्रकरणी पोलिसांनी आरोपी महेश बबन कड (वय ३२, रा. कडाचीवाडी, बापदेवस्ती) याच्यावर विविध कलमानुसार गुन्हा दाखल करून त्याला अटक केल्याची माहिती चाकण पोलिस ठाण्याचे वरिष्ठ पोलिस निरीक्षक प्रमोद वाघ यांनी दिली.
पोलिसांनी दिलेल्या माहितीनुसार, फिर्यादी आनंद कड याने त्याची मोटार मंदिरासमोर लावली. त्यावेळी आरोपीने गाडी लावण्याचे महिन्याला पाच हजार रुपयांची खंडणी मागितली. फिर्यादीने पैसे देण्यास नकार दिला. त्यावेळी आरोपीने मोटार लावली म्हणून मोटारीचे नुकसान केले. तसेच फिर्यादीला शिवीगाळ करून लाकडी दांडक्याने मारहाण केली. फिर्यादीचा मित्र भूषण खांडेभराड यालाही लाकडी दांडक्याने मारहाण केली. आरोपीने जमलेल्या लोकांना मोठ्याने ओरडून हातातील लाकडी दांडके भिरकावून परिसरात दहशत निर्माण केली. फिर्यादीच्या घरासमोरील दुसऱ्या चारचाकी कारचेही लाकडी दांडक्याने मारून नुकसान केले. फिर्यादीचा लहान भाऊ सुनील कड यालाही लाकडी दांडक्याने मारहाण केली असे फिर्यादीत म्हटले आहे.
दरम्यान, आरोपीचे वडील बबन कड व महेश कड यांनाही भूषण खांडेभराड (रा. कडाचीवाडी), आनंद कड या दोघांनी शिवीगाळ करून लाथा बुक्क्यांनी मारहाण केली. या दोघांविरोधातही तक्रार दाखल कोली आहे. बबन कड व त्यांची सून भांडण सोडविण्यासाठी गेले त्यावेळेस दोघांनी बबन कड व त्यांच्या सुनेला शिवीगाळ करून त्यांना ढकलून दिले व लाकडी दांडक्याने मारहाण केली.