चाकण, ता. २७ : खेड तालुक्यात आर्थिक दृष्ट्या मोठी असलेली मेदनकरवाडी ग्रामपंचायत समजली जाते तसेच या मेदनकरवाडी ग्रामपंचायतीची घरपट्टी, पाणीपट्टी व मागील थकबाकी भरण्यासाठी व चालू कराची वसुली करण्यासाठी ग्रामपंचायतीचे सरपंच, उपसरपंच व सर्व सदस्य यांनी पुढाकाराने वैयक्तिक देणगीतून बंपर लकी ड्रॉ बक्षीस योजना जाहीर केली आहे.
यामध्ये विविध प्रकारची बक्षीसे जिंकण्याची करदात्यांना संधी दिलेली आहे. असे मेदनकरवाडीचे सरपंच अमोल साळवे, उपसरपंच महेंद्र मेदनकर, ग्रामविकास अधिकारी सुदाम कड यांनी सांगितले.
खेड तालुक्यात मेदनकरवाडी ग्रामपंचायत ही मोठी समजली जाते. मेदनकरवाडी ग्रामपंचायतच्या हद्दीत सुमारे पन्नास हजारावर अधिक रहिवासी वस्ती आहे. यामध्ये कामगार वर्ग मोठ्या प्रमाणात आहे. ग्रामपंचायतीचे वार्षिक कराचे उत्पन्न सुमारे तीन ते साडेतीन कोटी रुपये आहे. परंतु निम्माच कर वसूल होतो. कर वसूल होण्यासाठी ग्रामपंचायतीने करदात्यांसाठी बक्षीस योजना जाहीर केलेली आहे. यामध्ये प्रथम क्रमांकासाठी तीन ग्रॅम सोन्याची एक अंगठी, द्वितीय क्रमांकासाठी एक फ्रिज, तृतीय क्रमांकासाठी एक एलईडी टीव्ही, चौथ्या क्रमांकाची बक्षीसे मिक्सर पाच आहेत. पाचव्या क्रमांकाची बक्षीसे फॅन (पंखे) पाच आहेत. सहाव्या क्रमांकाची बक्षीसे इस्त्री पाच आहेत. सातव्या क्रमांकाची बक्षीसे कुकर (तीन लिटर) पाच आहेत. आठव्या क्रमांकाची बक्षीसे डिनरसेट पाच आहेत. नवव्या क्रमांकाची बक्षीसे थर्मास पाच आहेत. दहाव्या क्रमांकाची बक्षीसे हॉटपॉट ११७ आहे. अशी एकूण दीडशे बक्षीसे करदात्यांना देण्यात येणार आहेत. या योजनेमध्ये ग्रामपंचायत सरपंच, उपसरपंच व सदस्य यांना सहभागी होता येत नाही.
एका व्यक्तीच्या नावावर अनेक मिळकती असल्या तरी एका व्यक्तीला एकच कुपन देण्यात येणार आहे. पती, पत्नीच्या नावे वेगवेगळ्या मिळकती कितीही असल्या तरी कुटुंब प्रमुख म्हणून एकच कुपन ग्राह्य धरले जाईल. दोन भावांच्या नावावर संयुक्त मिळकत असल्यास दोघांच्या नावे एकच कुपन टाकण्यात येणार आहे. कर भरताना धनादेश दिले जात असतील तर ते येत्या २५ सप्टेंबर पर्यंत स्वीकारले जाणार आहेत. रोखीने कर भरणा ३० सप्टेंबर पर्यंत करण्यात येणार आहे. या योजनेसाठी ग्रामपंचायत सरपंच अमोल साळवे, उपसरपंच महेंद्र मेदनकर, सदस्य संजय वाघमारे, स्वाती गवते, जयश्री भुजबळ, सिंधू मेदनकर, सुमन खरात, संभाजी मेदनकर, संकेत मेदनकर, सुरेखा मेदनकर, अजित मेदनकर, सलोनी मेदनकर, मंगल मेदनकर, विजय मेदनकर, पल्लवी भुजबळ, नीलम मेदनकर, गणेश भुजबळ आदी प्रयत्न करत आहेत. या योजनेसाठी बक्षीसे वैयक्तिकरित्या देण्यात आलेली आहेत.