चाकण, ता.१६: कंपनीची बस निघून गेली म्हणून गजानन बोलकेकर याने देहू फाटा येलवाडी (ता.खेड) येथे चाकण- तळेगाव मार्गावरून चाललेल्या दुचाकीस्वाराला अडवले व त्याच्याकडून लिफ्ट मागितली. पुढे एक किलोमीटर अंतरावर आल्यानंतर खालुंब्रे (ता. खेड) गावच्या हद्दीत दुचाकी घसरली आणि गजानन बोलकेकर या कंपनी अधिकाऱ्याचा ट्रेलरच्या चाकाखाली सापडून सोमवारी (ता.१४) मृत्यू झाला.
रस्त्यावर सुरक्षेचा अभाव, मोठमोठ्या खड्ड्यांमुळेच अपघात झाला आहे. गजाननच्या मृत्यूस शासनाच जबाबदार असल्याची प्रतिक्रिया नागरिक, प्रवाशांकडून व्यक्त होत आहे. आता तरी शासनाने डोळे उघडून योग्य उपाययोजना करण्याची मागणी नागरिकांकडून होत आहे.
खालुंब्रे येथे त्याच ठिकाणी एका महिन्यात तीन अपघात झालेले आहेत हा तिसरा अपघात आहे. त्यात तिघांचे जीव गेलेले आहेत. दरम्यान, गजानन हा दुचाकीवर लिफ्ट घेऊन देहू फाट्यापासून बसलेला होता. हुंदाई चौकात आल्यानंतर दुचाकी घसरली दुचाकी मार्गावरील चिखलामुळे घसरली. दुचाकीची पुढली बाजू पहिली ट्रेलरच्या चाकाखाली गेली. गजाननच्या अंगावरून चाके गेल्याने तो जागीच मृत्यू पावला. गजानन बोलकेकर ऑटोकॉम कार्पोरेशन पानसे प्रा. लिमिटेड या कंपनीत गेल्या नऊ महिन्यापासून एचआरएक्झिक्युटिव्ह म्हणून कंपनीत काम करत होते. ते सध्या येलवाडी (ता. खेड) येथे राहत होते. १८ एप्रिलला त्यांचा विवाह झाला होता. ते मुळचे बोळका, जि. नांदेड येथील आहे. त्यांच्या मागे आई-वडील, भाऊ, पत्नी असा परिवार आहे. कंपनीचे व्यवस्थापक सुरेश नायर व इतर कामगारांनी या दुर्दैवी घटनेबद्दल हळहळ व्यक्त केली. मा

याबाबत ऑटोकॉम कॉर्पोरेशन पानसे प्रा. लि.चे व्यवस्थापक सुरेश नायर यांनी सांगितले की, चाकण- तळेगाव मार्गावर मोठ्या प्रमाणात खड्डे पडलेले आहेत. अनेक कामगारांचे जीव जात आहेत. पण याकडे शासन कोणीच लक्ष देत नाही. एक कामगार गेल्याने त्याचे सगळे कुटुंब उद्ध्वस्त होत आहे.

08807

उद्योजक विजय बोत्रे,योगेश वाके यांनी सांगितले की, चाकण औद्योगिक वसाहतीतील अंतर्गत रस्ते तसेच मुख्य मार्ग चाकण तळेगाव, चाकण शिक्रापूर, पुणे-नाशिक मार्गाची अवस्था दयनीय आहे. खड्डे कोणीच बुजवत नाही. प्रशासन आहे की नाही हा प्रश्न पडतो आहे.