चाकण, ता. १६ : खेड तालुक्याच्या पश्चिम डोंगराळ भागात पावसाळ्याच्या दिवसात मोठ्या प्रमाणात पर्यटनाला ऊत येतो अनेक लोक पर्यटनासाठी या भागात जातात. डोंगरावरील रस्ते, चढउताराचा, वळणवळणाचे, धोकादायक अरुंद रस्ते त्यात रस्त्यांची कामे निकृष्ट पद्धतीने होतात. त्यामुळे वाहनांना अपघात होतो. कोणाचा धबधब्यात बुडून मृत्यू होतो. कोणाचा वाहनांमुळे अपघात झाल्याने मृत्यू होतो. त्यामुळे या भागात पर्यटन वाढले असले पर्यटनाला प्रसिद्धी मिळत असली तरी ती धोक्याची आहे असे नागरिकांचे, पर्यटकांचे, निसर्ग प्रेमींचे म्हणणे आहे.
खेड तालुक्यातील कुंडेश्वर घाट रस्त्यावरील पिकअप जीपला झालेला अपघात एक मोठी दुर्दैवी दुर्घटना आहे. या घटनेमुळे या भागातील पर्यटनावर प्रश्नचिन्ह निर्माण झाले आहे. या भागात पावसाळ्याच्या दिवसात मोठ्या प्रमाणात धबधबे वाहतात. देवदर्शनासाठी अनेक जण, भाविक वाहनातून दुचाकी तसेच इतर छोट्या, मोठ्या वाहनातून जातात. अनेकवेळा अपघात होतात. खेड तालुक्यात या दुर्घटनेने मोठी खळबळ उडाली आहे. या अपघातात ११ महिलांचा मृत्यू होणे तसेच अनेक महिला मुले जखमी होणे हे चिंतादायक आहे. पण यातून काही बोध घेणे ही गरजेचे आहे. पश्चिम डोंगराळ भागात रस्त्यांची कामे काही ठेकेदार करतात; परंतु ती कामे निकृष्ट दर्जाची होतात. त्यामुळे रस्ते पावसाळ्यात उखडतात वाहनांच्या प्रवासासाठी ते धोकादायक ठरत असतात.

ये-जा करण्यास रस्तेच नाहीत
पश्चिम डोंगराळ भागात धबधब्याची तसेच इतर धार्मिक क्षेत्रांची मोठी प्रसिद्धी केली जाते. तशा पद्धतीचे पर्यटकांसाठी, भाविकांसाठी येण्या जाण्यासाठी रस्ते नाहीत. हा पूर्णपणे डोंगराळ भाग तसेच पावसाचा मोठा परिसर असल्याने धोकादायक आहे. त्यामुळे या परिसरात पर्यटकांसाठी तसेच भाविकांसाठी सोयी-सुविधा होणे महत्त्वाचे आहे. परंतु त्या होत नाहीत त्यामुळे दुर्घटना घडतात.

पोलिसांनी बॅरिकेट्स लावणे गरजेचे
या भागात येणारे पर्यटक कोणत्या रस्त्याने जातात, कुठे जातात काय करतात याकडे कोणाचेच लक्ष नाही. या भागात अनेक टवाळखोर, मद्यपी तरुणही धांगडधिंगा घालतात. त्यावरही पोलिसांनी नियंत्रण आणणे गरजेचे आहे. या डोंगरभागातील मार्गावरून कोणती वाहने येतात जातात, यावर काही ठिकाणी पोलिसांनी बॅरिकेट्स लावणे गरजेचे आहे. काही ठिकाणी तपासणी नाके करणे महत्त्वाचे आहे. घाटातील वळणावळणाच्या चढाच्या रस्त्यावर संरक्षक कठडे असणेही महत्त्वाचे आहे. पण काही कामे होताना दिसत नाही.

सुट्यांच्या दिवसात पर्यटनाला मोठी गर्दी
खेड तालुक्याच्या पश्चिम भागात धबधबे पाहण्यासाठी, धबधब्यात उडी मारण्यासाठी, निसर्ग सौंदर्य पाहण्यासाठी, तसेच देवदर्शनासाठी मोठ्या प्रमाणात गर्दी होते. या गर्दीवर कोणाचा अंकुश नसतो. अरुंद रस्त्यामुळे मोठी वाहतूक कोंडी होते. पण याकडे पोलिस यंत्रणेचे, प्रशासनाचे मोठे दुर्लक्ष होत आहे असाही आरोप नागरिकांचा ,पर्यटकांचा आहे.