चाकण, ता. २९ : येथील तळेगाव- चाकण- शिक्रापूर मार्गावर मोठ्या प्रमाणात खड्डे पडले आहेत. पावसाळ्यात मार्गावरील खड्डे मुरूम मातीने भरण्यात आले. मात्र, पाऊस उघडल्यानंतर मुरूम, मातीच्या धुळीचे लोटचे लोट मार्गावर उडत आहेत. त्यामुळे दुचाकीस्वार, पादचाऱ्यांना मार्गावरून जायचे कसे? असा प्रश्न पडला आहे.
तळेगाव- चाकण- शिक्रापूर मार्गाची मोठ्या प्रमाणात दुरवस्था झाली आहे. या मार्गावर अनेक खड्डे आहेत. या खड्ड्यांमुळे अपघात होत आहेत. या खड्ड्यात काही ठिकाणी पाऊस पडल्यानंतर मोठ्या प्रमाणात पाणी साचते. मात्र, याकडे कोणीच लक्ष देत नाही.
पावसाच्या उघडिपीनंतर मार्गावर मुरूम मातीचे धुळीचे लोटच्या लोट उडत आहेत. दुचाकी चालकांना मास्क लावून तसेच नाका, तोंडावर हात ठेवून प्रवास करावा लागत आहे. त्यामुळे प्रवासी, स्थानिक नागरिकांच्या आरोग्याचा प्रश्न निर्माण झाला आहे. मात्र, याकडे कोणीच लक्ष देत नाही. राजकीय नेते निवडणुकीच्या कामात व्यस्त आहेत. त्यांचेही याकडे लक्ष नाही. मार्गावर मोठ्या प्रमाणात खडी निघून खड्डे पडलेले आहेत. मार्गाचे नव्याने काम कधी होणार? असा प्रश्न प्रवासी व नागरिकांना पडला आहे.

तळेगाव- चाकण- शिक्रापूर या मार्गाच्या दुरुस्तीसाठी, तसेच दोन्ही बाजूने एक लेन वाढविण्यासाठी ६० कोटींचा निधी सार्वजनिक बांधकाम मंत्र्यांनी मंजूर केला आहे. त्याची निविदा निघालेली आहे. या मार्गाचे काम संबंधित कंपनीला दिले जाणार आहे. या मार्गाच्या दुरुस्तीचे काम सार्वजनिक बांधकाम विभागाच्या वतीने खासगी ठेकेदार कंपनीच्या वतीने करण्यात येणार आहे. त्यानंतर काम मार्गी लागणार आहे. तोपर्यंत तरी नागरिक, कामगार, वाहन चालक यांना या रस्त्यावरून धोकादायक पद्धतीने धुळीत प्रवास करावा लागणार आहे, हे मात्र नक्की आहे.

रस्त्याचे काम लवकर करा
सामाजिक कार्यकर्ते तुकाराम कांडगे, दत्ता आढाव, नारायण नाईकरे यांनी सांगितले की, ‘‘तळेगाव- चाकण- शिक्रापूर मार्गाची मोठ्या प्रमाणात दुरवस्था झाली आहे. या मार्गावर दररोज अपघात होत आहेत. मार्गावर खडी, मुरूम निघाल्यामुळे त्यावरून दुचाकी घसरत आहेत. त्यात अनेकांचे जीव जात आहेत. त्यामुळे या मार्गाची दुरुस्ती लवकर करण्यात यावी. नुसती निविदा निघून अर्थ नाही, तर काम लवकर झाले पाहिजे. याकडे संबंधित प्रशासनाने लक्ष द्यावे.’’

09609