चास, ता. ८ : टोकावडे (ता. खेड) येथील शासकीय आश्रमशाळेत मुलांना सेंट्रल किचनच्या माध्यमातून देण्यात येणाऱ्या जेवणाचा दर्जा अतिशय सुमार आहे. वेळोवेळी आवाज उठवूनही त्यावर कोणतीही कारवाई होत नाही. रविवारी (ता. ७) भाजीत चक्क अळ्या तरंगताना दिसून आल्या. दिलेला भात कच्चा की शिजवलेला? हा प्रश्न पडत असून चपाती कच्ची व कडक आहे. विद्यार्थ्यांच्या जीवाशी चाललेला हा खेळ प्रकल्प विभाग उघड्या डोळ्याने बघत असल्याची नागरिकांमध्ये चर्चा आहे.
खेड तालुक्यातील टोकावडे, कोहिंडे व चिखलगाव या तीन आश्रमशाळा घोडेगाव प्रकल्प कार्यालयांतर्गत आहे. या आश्रमशाळांमध्ये गेल्या अनेक वर्षांपासून शाळेअंतर्गत किचनची व्यवस्था होती. मात्र या जेवणाच्या दर्जाबाबत व साठवणूक केलेल्या धान्य व भाजीपाल्याबाबत नेहमी तक्रारी होत असल्याने तसेच विद्यार्थ्यांना पोषक व परिपूर्ण आहार मिळावा या दृष्टीने मागील वर्षापासून सेंट्रल किचन संकल्पना उदयाला आली. या माध्यमातून या आश्रमशाळेतील व वसतिगृहातील विद्यार्थ्यांना उच्च दर्जाचा व परिपूर्ण पोषण देणारा अन्नपुरवठा सेंट्रल किचनच्या माध्यमातून आदिवासी विभागाच्या नियंत्रणाखाली करण्यास सुरूवात झाली. मात्र त्यातही भ्रष्टाचार होत असेल तर या मुलांनी दाद कोणाकडे मागायची? असा प्रश्न येथील नागरिक विचारत आहेत.
याबाबत घोडेगाव प्रकल्प अधिकारी संदीप पाटील यांच्याशी संपर्क साधला असता त्यांनी फोन उचलला नाही.

आलेल्या अन्नाची सर्वप्रथम आम्ही पाहणी करत असतो. मात्र रविवारी आमच्याकडे आलेल्या सोयाबीनच्या भाजीत अळ्या दिसून आल्याने आम्ही मुलांना जेवणात ही भाजी न देता वरण, भात, चपाती तसेच राजगिरा लाडू, बिस्कीट दिले.
- प्रमोद चोखांदरे, अधीक्षक, टोकावडे आश्रमशाळा