चास, ता.१४, खेड तालुक्याच्या पश्चिम पट्यातील चास, कमान, शिरगांव, टोकावडे, भोरगीरी, चिखलगांव, कळमोडी व परिसरात मॉन्सूनपूर्व पावसाचा जोर ओसरला आहे. खरीप हंगामातील पेरणीपूर्व मशागतींना वेग आला असून नांगरटी करणे, खते पांगवणे व अन्य कामांना वेगाने सुरुवात झाली आहे.
चालू वर्षी शेतीच्या कामांना बैलांपेक्षा यांत्रिक शेतीकडे शेतकऱ्यांचा जास्त कल दिसून येतो आहे. पेरणीपूर्व मशागतीबाबत चिखलगांव येथील प्रगतशील शेतकरी बाळासाहेब गोपाळे यांनी सांगितले की, शेतकरी शेतामध्ये रमल्याचे चित्र असून शेतांमध्ये नांगरटी करणे, खते पांगवणे, बांधबंदिस्ती करणे, पाळ्या घालणे ही कामे सुरू झाली आहेत.
शिरगांव येथील शेतकरी अशोक लांघी तसेच मारुती कोरडे यांनी सांगितले की, पावसामुळे आमची बरचशी शेती वाहून गेली, बांध फुटले यामुळे खरीप हंगाम हातचा जातो की काय अशी स्थिती होती मात्र तात्पुरत्या स्वरूपात झाडाच्या फांद्या लावून वाहून गेलेल्या शेतीच्या भागामध्ये माती टाकून भात लागवडी करण्यासाठी शेती तयार केली आहे. शेतांच्या नुकसानीचे पंचनामे न झाल्याने आम्ही अडचणीत आल्याचेही कोरडे यांनी सांगितले.