चास, ता. २७ : एस. एम. सुपे मेमोरिअल फाउंडेशन व रेड स्वस्तिक सोसायटी आयोजित ‘आरोग्य वारी, वारकऱ्यांची सेवा करी’ या उपक्रमांतर्गत संत तुकाराम महाराज पालखी सोहळ्यामध्ये वारकऱ्यांची आरोग्य सेवा करण्यासाठी आरोग्य पथक पुरविण्यात आले असल्याची माहिती फाउंडेशनचे डॉ. संतोष सुपे यांनी दिली.
आरोग्याचे हे पथक उरुळी कांचन ते वाखरी या मार्गावर वारकऱ्यांना आरोग्यसेवा देत असून, संस्थेचे आरोग्य सेवेचे १०वे वर्ष आहे. या आरोग्य वारीचे उद्‍घाटन संस्थांनचे विश्वस्त संतोष महाराज मोरे यांच्या हस्ते व डॉ. संतोष सुपे, स्त्रीरोग तज्ज्ञ डॉ. मंगल सुपे, लिज्जत उद्योग समूहाचे अध्यक्ष सुरेश कोते व ज्येष्ठ महिला वारकऱ्यांच्या हस्ते करण्यात आले. यावेळी सर्जन डॉ. उमाकांत वाबळे, डॉ. सीमा वाबळे, डॉ. अनिल पाटील, डॉ. मनोज दुधगावकर, डॉ. अनिल जोशी, डॉ. संदीप सांडभोर, डॉ. दत्तात्रेय खुणे आदी उपस्थित होते.
या आरोग्य वारीमध्ये १ रुग्णवाहिका २ डॉक्टर, ४ नर्स, ४ मदतनीस, असे १० जणांचे पथक कार्यरत असून, १ लाख रुपयांची सर्व आजारांवरील औषधे, गोळ्या, मलम, ड्रेसिंग साहित्य, तसेच शुगर, बीपी, ऑक्सिजन, वाफेचे मशिन या उपकरणांसह सज्ज आहे.