चास, ता. २१ ः खेड तालुक्याच्या पश्चिम पट्ट्यात तसेच वाडा परिसरात भाद्रपदी बैलपोळा आनंदी वातावरणात हलगी, डफड्याच्या तालावर साजरा करण्यात आला. थांबलेला पाऊस, जोमदार पिके व वातावरणातील उत्साह यांमुळे बैलपोळ्याचा जल्लोष दिसून आला. मात्र, काही गावात बैलांच्या मिरवणुकीत डीजेच्या तालावर नृत्यांगणांचे नृत्य सादर झाल्याने सणाला वेगळे स्वरूप प्राप्त झालेले दिसले.
यावर्षी पाऊस दमदार बरसला असून तालुक्याच्या पश्चिम पट्ट्यातील परिसरात खरिप हंगामातील पिके चांगली आली आहेत. समाधानकारक पिके असल्याने शेतकरी आनंदी असून ज्या बैलांच्या जीवावर शेती पिकलेली आहे त्या बैलांचा सण मोठ्या उत्साहात साजरा करण्यात आला. मुख्य बाजारपेठ असणाऱ्या वाडा गावात बैलपोळ्याच्या पार्श्वभूमीवर बैलांच्या सजावटीसाठी लागणाऱ्या नक्षीदार लेस, झालर, घुंगरमाळा, घंटी, फुगे, रंग यांसह अन्य वस्तूंसाठी मोठ्या प्रमाणावर खरेदी झाली. बैलपोळ्याच्या दिवशी झूली घालून गुलाल भंडाऱ्याची उधळण करीत, शिंगांना रंग व फुगे बांधुन वाडा गावातून बैलांच्या भव्य मिरवणुका पारंपारिक वाद्यांच्या तालावर काढल्या गेल्या. बळीराजा या मिरवणुकीत बेफाम होऊन नाचला. मात्र, डिजेच्या जमान्यात काही अतिउत्साहींनी मिरवणुकीत नृत्यांगणांचे नृत्य सादर केल्याने हा चर्चेचा विषय झाला. अनेकांनी अशा स्वरूपाच्या मिरवणुकीवर नाराजी व्यक्त करीत हे आपल्या संस्कृतीच्या विपरीत असल्याची भावना व्यक्त केली आहे.