खोडद, ता.३० : मांजरवाडी (ता.जुन्नर) येथे बिबट्याला पकडण्यासाठी  वनविभागाने लावलेल्या पिंजऱ्यात मंगळवारी (ता. ३०) तीन वर्षांची बिबट्याची मादी अडकली. बिबट्याचा बछडा येथे सोमवारी (ता. २९) सकाळी पिंजऱ्यात अडकला होता. सलग दुसऱ्या दिवशी दुसरा बिबट पिंजऱ्यात जेरबंद झाल्याने परिसरातील नागरिकांनी सुटकेचा निःश्वास सोडला.
कृषी उत्पन्न बाजार समितीचे संचालक माऊली खंडागळे यांच्या केळीच्या बागेत दोन दिवसांपूर्वी तीन बिबटे एकत्र फिरताना शेतकऱ्यांनी पाहिले होते. याबाबत राजश्री खंडागळे यांनी वनविभागाला माहिती दिली होती. त्यानुसार बिबट्या पकडण्यासाठी वनविभागाने येथे पिंजरा लावला होता.
दरम्यान, बिबट्याचे कुटुंब असून, त्यात तीन बिबटे आहेत, त्यापैकी दोन बिबटे पकडण्यात वनविभागाला यश आले आहे. या परिसरात आणखी एक बिबट्या आहे, त्यालाही पकडावे अशी मागणी होत आहे.
बिबट्या पिंजऱ्यात अडकल्याची माहिती मिळताच वनरक्षक ज्ञानेश्वर पवार, आपदा मित्र सुशांत भुजबळ, ग्रामपंचायत सदस्य उदय खंडागळे, संजय खंडागळे, रेस्क्यू टीमचे सदस्य रामकृष्ण चोपडा, तुषार टेके यांनी पिंजरा माणिकडोह येथील बिबट निवारा केंद्रात हलविण्यासाठी मदत केली.
01623