दौंड, ता. २६ : दौंड जंक्शन रेल्वे स्थानकाच्या प्रवेशमार्गावर उघड्यावर गांजा विक्री सुरू असताना रेल्वे फलाटावर १ किलो ७०० ग्रॅम गांजा सापडला आहे. एका बेवारस पिशवीत हा गांजा ठेवण्यात आला होता.
दौंड जंक्शन रेल्वे स्थानकावरून गुरूवारी (ता. २५) रात्री भुवनेश्वर-छत्रपती शिवाजी महाराज टर्मिनस (मुंबई) कोणार्क एक्सप्रेस रवाना झाल्यानंतर हा गांजा आढळला. रेल्वे सुरक्षा दलाच्या गस्ती पथकाला फलाट क्रमांक एक वर एक बेवारस कापडी पिशवी आढळून आली. फलाटाच्या पुणे बाजूला असणाऱ्या एका लोखंडी बाकड्याखाली ही बेवारस कापडी पिशवी ठेवली होती. दरम्यान, पिशवीच्या संबंधितांना माहिती देत तपासणी केल्यावर त्यामध्ये चार प्लॅस्टिक पिशव्यांत एकूण एक किलो ७०० ग्रॅम गांजा आढळून आला. दौंड लोहमार्ग पोलिस ठाण्यात रेल्वे सुरक्षा दलाचे अंमलदार वीरेंद्रसिंग सोळंकी (रा. दौंड) यांनी याप्रकरणी फिर्याद दाखल केली आहे. फिर्यादीनुसार अज्ञाताविरुध्द गुंगीकारक औषधी द्रव्ये व मनोव्यापारांवर परिणाम करणारे पदार्थ अधिनियम १९८५ मधील कलमान्वये गुन्हा दाखल केला आहे. दौंड रेल्वे स्थानकाच्या हुतात्मा चौकातील प्रवेशमार्गावरच एका महिलेकडून रेल्वेच्या जागेत गांजाची उघड्यावर विक्री सुरू आहे. पण याकडे रेल्वे प्रशासन आणि दौंड पोलिसांकडून कारवाई टाळली जाते.