देऊळगाव राजे, ता. २९ : रावणगाव व खडकी (ता. दौंड) येथे पुण्याचे विभागीय कृषी सहसंचालक दत्तात्रेय गावसाने यांनी डाळिंब बागेस भेट देऊन पाहणी केली. यावेळी त्यांनी शेतकऱ्यांना मार्गदर्शन केले.
रावणगाव येथील भाऊसाहेब फुंडकर फळबाग लागवड योजेनेमधून लाभ घेतलेल्या किरण रांधवण या शेतकऱ्यांना महाडीबीटी पोर्टलवर येणाऱ्या अडचणी, डाळिंब उत्पादक शेतकऱ्यांच्या डाळिंब पिकाबाबत येणाऱ्या तेल्या रोग, बाजारभाव, इत्यादींच्या अडचणी जाणून घेतल्या. डाळिंब उत्पादक शेतकरी बागांना वापरत असलेल्या संरक्षक जाळी, शरदकिंग सारखा नवीन वाण इत्यादी बाबत शेतकऱ्यांचे अनुभव समजून घेतले. महाराष्ट्र ग्रामीण रोजगार हमी योजनेमधून शेतकऱ्यांना फळबाग लागवड करण्यास अडचणी येत असतील तर त्याबद्दल माहिती वरिष्ठ कार्यालयास कळवावी. त्यावर मार्ग काढून जास्तीत जास्त शेतकऱ्यांना या योजनेमधून लाभ कसा देता येईल यासाठी प्रयत्न करावा, अशा सूचना गावसाने यांनी क्षेत्रीय अधिकाऱ्यांना दिल्या.
दरम्यान, गावसाने यांनी विकास शितोळे यांच्या प्रधानमंत्री सुक्ष्म अन्न प्रक्रिया उद्योग योजनेअंतर्गत लाभ घेतलेल्या बळीराजा ॲग्रो तेलघाणा प्रकल्पास भेट दिली.
यावेळी तालुका कृषी अधिकारी राहुल माने, मंडळ कृषी अधिकारी दिनेश फडतरे, उपकृषी अधिकारी हनुमंत बोडके, सहायक कृषी अधिकारी अंगद शिंदे, अतुल होले, अझहर सय्यद, शंकर कांबळे, प्रगतशील शेतकरी निखिल आटोळे, सचिन आटोळे, राजेंद्र शितोळे, प्रणाल शितोळे, मयूर आरेकर, राजेश फाजगे उपस्थित होते.

00593